کسی بھی انسان کی صحت منگ زندگی  کے لیے مکمل اور پرسکون نیند کا کردار بہت اہم ہوتا ہے۔

نیند کے حوالے سے بچوں سے لے کر بزرگوں تک سب کے لیے ایک خاص دورانیہ ضروری ہوتا ہے اور دن بھر میں اس سے کم نیند صحت کو متاثر کرتی ہے۔

صرف یہی نہیں بلکہ اب طبی ماہرین نے نیند کو دل کی بہتر صحت کے اہم محرکات میں بھی شامل کرلیا ہے۔

امریکا کے ایک نجی طبی تحقیقاتی ادارے نے اپنی صحت قلب کے ضروری محرکات کی فہرست میں نیند کا دورانیہ  بھی شامل کردیا ہے۔

ادارے نے 2010 سے چلنے والے ’لائفس سمپل 7‘ سوالنامے کی جگہ اب ’لائفس ازینشل 8‘ نامی ایک سوالنامہ  بنایا ہے جو کسی شخص کی صحت قلب کا تعین کرنے کے لیے 8 اہم محرکات کی پیمائش کرتا ہے۔

ادارے کے بنائے گئے نئے سوال نامے میں نیند کے علاوہ باقی پرانے 7 محرکات برقرار ہیں جن میں خوراک، جسمانی سرگرمی، نیکوٹین کی موجودگی، باڈی ماس انڈیکس، بلڈ لپڈز، بلڈ گلوکوز اور بلڈ پریشر شامل ہیں۔

ادارے کے چیف میڈیکل آفیسر کے مطابق جب محققین نے پچھلی دہائی کے دوران نئے سائنسی نتائج کا جائزہ لیا تو اس میں دل کی صحت میں نیند کردار کو بہت اہم پایا گیا۔

ان کا مزید کہنا تھا کہ نیند کا مناسب دورانیہ مکمل نہ کر پانے والے لوگوں میں موٹاپا، بلڈ پریشر اور ذیابیطس جیسے مسائل کا امکان زیادہ ہوتا ہے۔

لاس اینجلس میں یونیورسٹی آف سدرن کیلیفورنیا کے کیک سکول آف میڈیسن کے کلینکل ایسوسی ایٹ پروفیسر  کا اس حوالے سے کہنا ہے کہ بالغ افراد کو رات  میں کم از کم 7 سے 9 گھنٹے تک سونا چاہیے۔

ان کا  مزید کہنا ہے کہ اگر  رات کو سونے کے دوران بار بار آپ کی آنکھ کھلتی رہی تو یہ آپ کو گہری نیند میں جانے سے روک دے گا  جو   ہائی بلڈ پریشر اور بلڈ شوگر کی سطح میں اضافے کا باعث بن سکتا ہے جس کا تعلق ذیابیطس اور موٹاپے سے ہے۔

انہوں نے کہا کہ یہ صورتحال صحت قلب کو کمزور کرنے اور حرکت قلب بند ہونے کے خطرات کو بڑھادیتی ہے۔