اکثر ہم سنتے ہیں کہ زیادہ گوشت کھانا مضر صحت ہے لیکن کیا آپ یہ بات جانتے ہیں کہ جو لوگ گوشت کھانے سے پرہیز کرتے ہیں ان کو کن بیماریوں کا سامنا کرنا پڑسکتا ہے۔

حال ہی میں کی گئی ایک تحقیق سے یہ بات سامنے آئی ہے کہ جو لوگ سبزی شوق سے کھاتے ہیں ان میں ڈپریشن کا شکار ہونے کے امکانات دگنے ہوجاتے ہیں یعنی جو لوگ گوشت کھانے سے پرہیز کرتے ہیں ان میں ڈپریشن ہونے کے امکانات بڑھ جاتے ہیں۔

ماہرین نے تحقیق کے لیے 14 ہزار سے زائد بالغ افراد سے کھانے سے متعلق سوالات کیے، ان میں 35 سے 75 سال کے افراد شامل تھے۔

ماہرین نے رضاکاروں کے طرز زندگی کو بھی مدِ نظر رکھا اور نتائج اخذ کیے کہ عام طور پر ڈپریشن میں وہ لوگ مبتلا ہو رہے ہیں جو جان بوجھ کر وسعت رکھنے کے باوجود گوشت نہیں کھاتے۔

ماہرین کا کہنا ہے کہ سبزی کھانے والے افراد میں ڈپریشن کا شکار ہونے کے امکانات دگنے پائے گئے تاہم مکمل طور پر واضح نہیں ہے کہ ڈپریشن کا شکار صرف سبزی کھانے اور گوشت سے پرہیز ہی سے ہے۔

ماہرین نے بتایا کہ عام طور پر جو افراد معاشی و سماجی سطح پر اچھی زندگی گزار رہے ہوتے ہیں اور وہ گوشت کھانے سے پرہیز کرتے ہیں تو ان میں ڈپریشن کے امکانات زیادہ ہوتے ہیں۔

ماہرین کے مطابق مکمل طور پر یہ نہیں کہا جا سکتا کہ ڈپریشن کا سبب صرف سبزی کھانا ہی ہے تاہم تحقیق سے اس بات کے شواہد ملے کہ گوشت نہ کھانے والے افراد کے مقابلے سبزی خور زیادہ ڈپریشن کا شکار ہوتے ہیں۔

ماہرین نے کہا کہ ممکنہ طور پر اس کا سبب گوشت میں پائی جانے والی وٹامنز اور آئرن کی کمی کی وجہ سے دماغ متحرک نہیں رہتا اور ڈپریشن کا شکار ہوجاتا ہے۔