دنیا کی ایک بڑی آبادی موٹاپے کا شکار ہے اور وہ اس سے نجات کے لیے مختلف جتن بھی کرتی نظر آتی ہے تاہم کبھی کبھار وزن کم کرنے کے لیے ایسے انوکھے طریقے بھی سامنے آتے ہیں جنہیں جان کر آپ حیرت میں پڑ جاتے ہیں۔

اسی ضمن میں جاپانی محققین کا کہنا ہے وزن کم کرنا اتنا ہی آسان ہے جتنا چیونگ گم چباتے ہوئے پیدل چلنا۔

طبی ماہرین کا ماننا ہے کہ چیونگم آپ کو صحت کے بہت سے فوائد سے نوازتی ہے لیکن فائدے اسی وقت آپ کے لیےکار آمد ثابت ہو سکتے ہیں جب آپ اسے ایک حد میں رہتے ہوئے اسے استعمال کریں۔

چیونگم کی خوشبو نہ صرف ہماری سانسوں کو تروتازہ رکھ سکتی ہی بلکہ سگریٹ نوشی پر قابو پانے، یاد داشت کو بہتر بنانے اور وزن کم کرنے میں بھی مدد فراہم کر سکتی ہے۔

کیلوری جلائے

چہل قدمی کرنا وزن کم کرنے میں معاون ثابت ہوتا ہے تاہم اگر اس کے دوران چیونگم چبائی جائے تو یہ دل کی دھڑکن بڑھانے اور کیلوری کو جلانے میں اور بھی اضافہ کردیتا ہے۔

جرنل آف فزیکل تھراپی سائنس میں شائع ہونے والی ایک تحقیق کے مطابق چہل قدمی کے دوران چیونگم چبانا لوگوں کو زیادہ تیزی سے چلنے اور توانائی کی زائد مقدار استعمال کرنے کی ترغیب دیتی ہے، جس سے لوگوں کو عمر بڑھنے کے ساتھ وزن بڑھنے سے بچنے میں مدد مل سکتی ہے۔

بھوک میں کمی

چیونگم چبانے سے یہ احساس رہتا ہے کہ آپ کچھ کھا رہے ہیں اس طرح آپ کو بھوک کم لگتی ہے  اور ساتھ ہی پیٹ بھرے ہونے کا احساس رہتا ہے جس سے آپ کم کھانا کم کھاتے ہیں اور یہی عمل آپ کے وزن میں کمی کا سبب بنتا ہے۔

زیادہ کھانے کی طلب میں کمی

کھانے سے پہلے اور بعد میں چیونگم کا ایک ٹکڑا چبانے سے میٹھا کھانے طلب میں کمی واقع ہوتی ہے اور زیادہ کھانے سے بچنے میں مدد ملتی ہے، فرنٹیئرز ان سائیکالوجی میں شائع ہونے والی ایک تحقیق سے یہ بات سامنے آئی ہے چیونگم لوگوں میں زبردستی یا بے وقت  کھانے کی طلب یا خواہش کو کم کرنے مدد گار ثابت ہو سکتی ہے۔

کیا چیونگم وزن کم کرسکتی ہے؟

اگرچہ چیونگم کیلوری کو کم کرنے موٹا کرنے والے اسنیکس  سے بچنے میں مدد کر سکتی ہے، لیکن یہ ضروری ہے کہ اس کی زائد مقدار استعمال نہ کی جائے۔

واضح رہے کہ تمام طبی ماہرین اس  بات سے متفق ہیں کہ چیونگم غذائیت کے اعتبارسے کچھ بھی نہیں ہے، اسی لئے اسے کسی بھی کھانے یا غذا کا نعم البدل نہیں سمجھنا چاہئے اور اس کے زائد استعمال سے گریز کرنا چاہئے۔