بچے ہو یا بڑے پاستا جسے نوڈلز بھی کہا جاتا ہے بہت شوق سے کھاتے ہیں اس کی پسندیدگی کی سب سے بڑی وجہ اس کا فوری تیار ہونا اور ساتھ ہی اس کا ذائقہ جوآپ کی طلب بڑھاتا ہے۔ بازار میں مختلف کمپنیوں کے انسٹنٹ نوڈلز مختلف ذائقوں میں عام دستیاب ہیں ایسے  بچے جو اسکول اور کالج میں پڑھتے ہیں یہ نوڈلز ان کی مرغوب غذا ہوتی ہے۔

کچھ لوگ اس کے نقصان سے واقف ہیں جبکہ ابھی بھی ایک کثیر تعداد موجود ہے جو اسے صحت کے لیے مفید سمجھتی ہے۔ تاہم حالیہ تحقیق کے نتیجےمیں اسے صحت کے لیے انتہائی مضرقرار دیا ہے۔ اس تحقیق کے مطابق فوری تیار ہوے والے نوڈلز لوگوں میں فالج اور دل کی بیماری سے منسلک میٹابولک تبدیلیوں کے خطرے کو کئی گنا بڑھاتے ہیں۔

نوڈلز دل کی بیماری کا سبب کیوں بنتے ہیں؟

ان نوڈلز میں ٹرٹیری بٹائل ہائیڈروکوئنون یا جسے عام طور پر ٹی بی ایچ کیو کہا جاتا ہے، استعمال کیاجاتا ہے جو پٹرولیم انڈسٹری کا ایک ضمنی پروڈکٹ اور سستے پراسیسڈ فوڈز کو محفوظ رکھنے کے لیے کثرت سے استعمال ہونے والے فوڈ ایڈیٹیو ہے۔

ماہرین نے یہ جاننے کے لیے کہ یہ معدے میں جاکر کس طرح ہاضمے کے نظام سے گزرتے ہیں تجربہ کیا۔ انہوں نے پیٹ کے اندر ٹائم لیپس ویڈیو کا استعمال کرتے ہوئے یہ دیکھا کہ نوڈلز کھانے اور ہضم کرنے کے دو گھنٹے بعد کیا ہوتا ہے۔ اس تجربے کے بعد جو نتائج سامنے آئے وہ چونکا دینے والے تھے۔

تازہ نوڈلز کے مقابلے میں، پروسیس شدہ گھر کے بنے ہوئے یہ نوڈلز کم ٹوٹے ہوئے تھے، جبکہ انہیں ہضم ہونے کے لیے کافی وقت دیاگیا تھا ساتھ ہی ان نوڈلز نے غذائی اجزاء کے جذب ہونے کی صلاحیت کوبھی متاثرکیا، اور اس میں موجود پرزرویٹوز ہضم ہونے کے بجائے پیٹ میں دیر تک موجود رہے۔

جبکہ ان انسٹنٹ نوڈلز میں جو  اہم اجزاء موجود ہوتے ہیں ان میں  پام آئل، گندم کا آٹا، نمک اور چینی شامل ہیں یہ صرف نوڈلز کے اجزاء ہیں۔

تاہم اس کے ساتھ مصنوعی ذائقے اور رنگ کا ایک پیکٹ بھی دیا جس میں مونوسوڈیم گلوٹامیٹ، پاؤڈر نمک، چینی اور مصالحے ہوتے ہیں۔

آپ مصنوعی رنگوں اور ذائقوں کے خوفناک اثرات سے پہلے ہی واقف ہیں، اس لیے پراسیس شدہ گندم اور سوڈیم کی زیادہ مقدارانہیں لذیذ بنانے میں اہم کردار ادا کرتی ہے۔ آپ کو یہ جان کر حیرت ہوگی کہ اس طرح کے نوڈلز کے صرف ایک پیکٹ میں 2,700 ملی گرام سوڈیم موجود ہوتا ہے۔ جو بلڈ پریشر بڑھانے کا سبب بن سکتا ہے اور بلڈ پریشر میں اضافہ امراض قلب کا خطرہ بڑھاتا ہے۔

نتیجہ

جنوبی کوریا میں کی گئی ایک تحقیق، جسے دنیا میں انسٹنٹ نوڈلز کے صارفین کی سب سے زیادہ فی کس تعداد سمجھا جاتا ہے، نے ظاہر کیا کہ 11,000 افراد میں، جو لوگ زیادہ انسٹنٹ نوڈلز کھاتے ہیں ان میں میٹابولک سنڈروم، فالج اور ذیابیطس کا خطرہ دیگر کی نسبت بہت زیادہ ہوتا ہے۔

لہذا اپنے خاندان اور بچوں کو صحت مند رکھنے کے لیے بازار میں دستیاب نوڈلز سے مکمل طور پر دور رہیں اور اس کے برعکس گھر کے بنے ہوئے پاستا کو اپنی غذا کا حصہ بنائیں تا کہ آپ بیماریوں سے محفوظ رہ سکیں۔