آنکھیں شخصیت کا آئینہ ہوتی ہیں اور اسی سے سارے راز عیاں ہوجاتے ہیں۔اسی طرح آنسو بھی آپ کے احساسات کی عکاسی کرتے ہیں آپ خوش ہیں یا غمگین آنسو ہی اس بات سے آگاہ کرتے ہیں۔

کیا کبھی آپ نے غور کیا ہے کہ ہے کہ مختلف احساسات جیسے خوشی یا بہت زیادہ ہنسنے کی صورت میں تو  آنسو بہتے ہی ہیں لیکن اگر آنکھ میں کوئی شے بھی گرجائے  تب بھی آنکھوں سے پانی بہنے لگتا ہے یہ بھی آنسو کی ہی ایک شکل ہے تاہم یہ سب آنسو ایک دوسرے سے مختلف ہوتے ہیں۔

یہاں پر مختلف آنسو کی اقسام  اور آنکھوں کے لیے ان کی افادیت کا ذکر کیا جارہا ہے کہ یہ کس طرح آپ کی آنکھوں کی حفاظت کرتے ہیں۔

 ہماری آنکھیں تین قسم کے آنسو پیدا کرتی ہیں ،پہلی قسم بیسل سیکریشن کی ہے جو ہماری آنکھیں باقاعدگی سے اپنے آپ کو پرورش کرنے ،صاف اور بیکٹیریا سے پاک رکھنے کے لئے بناتی ہیں یہ عام طور پر ہمیشہ موجود ہوتے ہیں ۔

 دوسری قسم کے آنسو جو ہماری آنکھیں پیدا کرتی ہیں وہ کسی چیز کے آنکھوں میں چلے جانے جیسے دھواں اور ریت کے ذرات یا جلن کی صورت میں بنتے ہیں ۔

 تیسری قسم جذباتی آنسو ؤں کی ہیں جو جذبات کے جواب میں پیدا ہوتے ہیں بصارت کے ماہرین کا کہنا ہے کہ جذباتی آنسو دوسرے آنسوؤں سے مختلف ہیں ان میں پروٹین اور ہارمون ہوتے ہیں جبکہ پہلی دو قسموں میں ان کا وجود نہیں ہو تا ۔

 یہی وجہ ہے یہ درد اور اضطرابی کیفیات سے نجات دینے میں مدد فراہم کرتے ہیں اور جسم کو دوبارہ پر سکون حالت میں لانے میں اہم کردار ادا کرتے ہیں ۔ آنسو ہماری آنکھ کو نمی فراہم کرتے ہیں جس سے بینائی بہتر ہوتی ہے اس میں کئی طرح کے کیمیکل ہو تے ہیں جو آنکھ کی صفائی کرنے ،بیکٹریا کو مارنے، نقصان دہ جلن کو ختم کرنے اور کئی طرح کے انفیکشن سے بچاتے ہیں ۔

 آنسو میں اٹھانوے فیصد پانی ،کچھ مقدار نمک اور فیٹی آئل اور پندرہ سو مختلف پروٹین ہوتے ہیں ،اس میں ایک طرح کا اینٹی بیکٹیریل کیمیکل بھی پایاجا تا ہے جو انفیکشن سے لڑنے میں مدد دیتا ہے۔

ماہرین بصارت کا اس ضمن میں مزید یہ کہنا ہے کہ آنسو ایسے افراد کے لئے بے پناہ افادیت رکھتے ہیں جو اسکرین کے سامنے بیٹھ کر کام کرتے ہیں یہ ان کی آنکھوں کی خشکی کو دور کربینائی کو بہتر بناتے ہیں۔