مٹر کو ہری سبزی ہونے کے سبب پاور فوڈ کہا جاتا ہے یہ انسانی صحت کیلئے انتہائی مفید خوراک ہے۔

مٹر میں پروٹین 23 فیصد، کاربوہائیڈریٹس  50فیصد جبکہ وٹامن بی کافی مقدار میں پایا جاتا ہے، اس میں سَلفر اور فاسفورس بھی دیگر اجزاء کی نسبت زیادہ مقدار میں موجود ہوتا ہے ،مٹر میں آئرن، فائبر، پروٹین، وٹامن اے، ایچ، بی، ای اور سی بھی پایا جاتا ہے۔

غذائی ماہرین کے مطابق مٹر میں کئی غذائی اجزاء موجود ہوتے ہیں جو کہ انسانی صحت اور تندرستی کے لئے بے حد ضروری ہیں، مٹر کی تاثیر گرم ہوتی ہے جبکہ یہ جسم کو غذائیت پہنچا کر پٹھوں اور اعصاب کو مضبوط بناتا ہے۔

مٹر ہر عمر کے فرد کے لئے مفید سبزی ہے مگر اسے وزن میں کمی لانے کے خواہشمند افراد کے لئے مفید قرار نہیں دیا جاتا۔

اس کے علاوہ مٹر کھانے کے 4 بڑے طبی فوائد بھی ہیں جو درج ذیل ہیں۔

مٹرکا باقاعدہ استعمال نیاسین نامی اجزا سے بھرپور ہوتا ہے جو مضر کولیسٹرول اور چکنائیوں کو بڑھنے سے روکتا ہے۔ اس طرح مضر کولیسٹرول کم ہوتا ہے اور مفید کولیسٹرول میں اضافہ ہوتا ہے۔

مٹر ذیابیطس کے مریضوں کیلئے انتہائی مفید ہے کیوں کہ مٹرکھانے سے خون میں شکر کی مقدار قابو میں رہتی ہے۔

 چونکہ مٹر میں وٹامن بی 6 ، وٹامن سی اور فلیٹ یعنی فولک ایسڈ کی بڑی مقدار پائی جاتی ہے تو یہ ہماری جلد کے لیے انتہائی مفید غذا تصور کی جاتی ہے۔

اگر ہمیں پروٹین کی ضرورت ہو تو ہم گوشت، انڈوں اور دودھ وغیرہ کا استعمال کرتے ہیں لیکن یہاں ہم آپ کو بتاتے چلیں کہ مٹر بھی ہمیں بہترین پروٹین فراہم کر سکتے ہیں۔