سرکہ کی افادیت سے کون واقف نہیں یہ صدیوں سے کھانے میں ذائقہ اور صحت کے مسائل کے حل کے لئے استعمال کیا جاتا رہا ہے۔ سرکہ کئی پھلوں سے تیار کیا جاتا ہے ان میں انگور ،ناشپاتی ،کھجور کشمش اور سیب وغیرہ شامل ہے۔

یوں تو یہ تمام ہی سرکے جسم میں کئی طرح کے امراض میں شفا کے لئے بہت مفید مانے جاتے ہیں لیکن سیب کا سرکہ ان سب میں حیرت انگیز خواص رکھتا ہے۔

جانوروں پر کی جانے والی ایک تحقیق کے مطابق سیب کا سرکہ جسم میں کولیسٹرول اور ٹرائی گلیسرائیڈ کو توازن میں رکھتا ہے اس طرح یہ امراض قلب سے تحفظ فراہم کرنے میں معاون ثابت ہوتا ہے۔

سیب کے سرکے میں موجود خمیر اور مختلف بیکٹیریا جسے مدر یا پروبایوٹک کہا جاتا ہے یہ وہ بیکٹیریا ہیں جو نظام انہضام کو بہتر بنانے میں معاون ثابت  ہوتے ہیں اور بہتر ہاضمہ بہتر صحت کی علامت ہے۔

سیب کا سرکہ خون میں چینی کی سطح کو کم کرنے میں بھی اہم کردار ادا کرتا ہے اس طرح یہ ذیابیطس سے بچانے میں معاون ثابت ہوتا ہے۔

یہ وزن کم کرنے کی حیرت انگیز صلاحیت رکھتا ہے اس کا باقاعدہ استعمال آپ کا وزن کم کے کئی امراض سے بچاتا ہے ۔

 سیب کا سرکہ جوڑوں کے درد جسے گٹھیا کا مرض کہا جاتا ہے اس کے علاج میں کسی مسیحا سے کم نہیں۔ گٹھیا کا مرض ہاتھوں،انگیلیوں ،کہنیوں،گھٹنوں غرض کہ جسم کے تمام جوڑوں کے لئے اذیت ناک درد ،جلن اوراکڑن کا سبب بنتا ہے جس سے مریض کے لئے روز مرہ کے معمول کے کام انجام دینا مشکل ہی نہیں ناممکن ہو جاتا ہے۔