ماں کا دودھ بچے کی پہلی صحت بخش غذا ہے ماں کے دودھ میں ایسے اجزاء پائے جاتے ہیں جو اسے بچپن سے بڑھاپے تک نہ صرف صحت مند رکھتے ہیں بلکہ کئی بیماریوں سے تحفظ بھی فراہم کرتے ہیں۔

ماں کے دودھ میں ایسے مالیکیولزموجود ہوتے ہیں جو بچوں میں مختلف الرجی کے خطرے کو کم کر سکتے ہیں۔  یہ بات ایک تحقیق کے نتیجے میں سامنے آئی ہے۔

ایک نئی تحقیق کے مطابق ماں کے دودھ میں چھوٹے مالیکیولز بچوں میں دائمی الرجی جیسے ایکزیما اورمختلف غذا سے ہونے والی الرجی پیدا کرنے کے امکانات کو کم کر سکتے ہیں۔

محققین کا کہنا ہے کہ اس تحقیق کے نتائج ماؤں کو دودھ پلانے کی جانب راغب کرنے کے تحریک پیدا کرسکتے ہیں ساتھ ہی اس سے دودھ پلانے والوں والی ماؤں کی حوصلہ افزائی بھی ہوتی ہے جو اپنے اس عمل سے بچوں کو مستقبل میں دائمی الرجی سے محفوظ رکھ سکتی ہیں۔

ایٹوپک الرجی جیسے مختلف غذا سے ہونی والی الرجی، دمہ، اور جلد کی ایک ایسی حالت جسے ایٹوپک ڈرمیٹائٹس کہتے ہیں، دنیا بھر میں تقریباً ایک تہائی بچوں میں اس وقت جنم لیتی ہیں جب یہ بچے کمزور مدافعتی نظام کے ساتھ ماحول کا سامنا کرتے ہیں۔

پیڈیاٹرکس کے ایسوسی ایٹ پروفیسر اور پین اسٹیٹ ہیلتھ چلڈرن ہسپتال کے ماہر امراض اطفال سٹیون ہکس کا کہناہے کہ تین ماہ سے زیادہ ماں کا دودھ پینے والے شیر خوار بچوں میں اس الرجی  کا خطرہ کم ہو سکتا ہے۔

ماں کے دودھ میں موجود مائیکرو رائبونیوکلک ایسڈز چھوٹے مالیکیولزکی صورت میں موجود ہوتے ہیں جوبچے کے پورے جسم میں جین کے طریقہ کار کو منظم کر سکتے ہیں۔

ہکس کا کہنا ہے کہ ماں کے دودھ میں تقریباً 1,000 مختلف قسم کے مائیکرو رائبونیوکلک ایسڈز ہوتے ہیں تاہم اس کی ساخت تمام خواتین میں وزن، غذاکے میعار اور جینیات جیسی زچگی کی خصوصیات کی وجہ سے مختلف ہوتی ہے۔ تاہم ان میں صرف چار بچوں کی الرجی کے خلاف تحفظ فراہم کر سکتے ہیں۔

اس مقصد کے لیے محققین نے 163 ماؤں کو تحقیق میں شامل کیا جنہوں نے بچوں کی پیدائش سے لے کر کم از کم چار ماہ یا 12 ماہ تک دودھ پلانے کا منصوبہ بنایا ساتھ ہیں انہوں نے یہ بھی نوٹ کیا بچے ایک وقت میں کتنے دیر تک ماؤں سے فیڈ لیتے ہیں۔

نتائج سے بات سامنے آئی ماں کا دودھ بچوں میں مستقبل میں ہونے والی الرجی سے تحفظ فراہم کرتا ہے۔