حسین نظر آنا ہرایک فطری حق ہے اور خواتین اس سلسلے میں کافی محتاط رویہ رکھتی ہیں جبکہ اس مقصد کے لیے وہ  گھریلواور کیمیکل سے پاک اشیاء کو ترجیح دیتی ہیں۔

لیموں جہاں صحت کے لیے بے پناہ افادیت رکھتا ہے وہی یہ آپ کے حسن کو بڑھانے میں کسی سیلون سے کم نہیں۔ اس میں موجود اجزاء جلد کی رنگت نکھارنے سے لے کر کئی طرح کے انفیکشنز سے تحفظ فراہم کرتے ہیں۔

اسی لیے یہاں پرخوبصورتی کو بڑھانے کے لیے لیموں کے چند  حیرت انگیز استعمال پیش کئے جارہے ہیں جو آپ کے لیے نہایت کار آمد ثابت ہوں گے۔

لیموں کے چند حیرت انگیز بیوٹی ہیکس

 پاؤں کی حفاظت لیموں کے ساتھ

کیا آپ جانتے ہیں کہ مشہور شخصیات اپنے پیروں کو صحت مند اور پرکشش رکھنے کے لیے کیا طریقہ اختیار کرتی ہیں؟ نہیں تواج جان لیں۔

اس مقصد کے لیے ایک برتن میں اتنا نیم گرم پانی شامل کریں کہ جس میں آپ اپنے پیروں کو آسانی سے ڈبو سکیں، اب اس میں اپنا من پسند ایسنشیل آئل جیسے روز میری یا لیونڈرآئل کے چند قطرے، لیموں کا رس اورایپسم نمک شامل کریں اب اپنے پیروں کو چند منٹ کے لیے اس میں ڈبو کر رکھیں پھر صاف پانی سے دھولیں۔

ہونٹ کے لیے قدرتی موئسچرائزر

لیموں کا رس ہونٹوں کی نزاکت اور نرمی کو برقرار رکھنے کے لیے سب سے مفید مانا جاتا ہے خاص طور پر سردیوں میں کیونکہ اس موسم مں ہونٹوں کا خشک ہونا ایک عام مسئلہ ہے۔

ذیل میں ایک سادہ اور آسان لپ بام تیارکرنے کا طریقہ بیان کیا جارہا ہے۔

1 کھانے کا چمچ اچھی کوالٹی کی ویزلین، 1 چائے کا چمچ شہد اور 1 کھانے کا چمچ لیموں کا رس لیں۔ ویزلین کو گرم کریں پھراس میں لیموں کا رس اور شہد شامل کر کےاچھی طرح ملا ئیں۔

اس مکسچر کو ایک پیالے میں ڈال کرتقریباً 10 منٹ کے لیے فریج میں اور اس کے بعد اسے تقریباً 4 گھنٹے کے لیے فریزر میں رکھ دیں بہترن لپ بام تیار ہے۔

بالوں کو قدرتی طور پر ہلکا کریں

بالوں کو قدرت طور بلیچ یعنی اس کی ٹون کو ہلکا کرنے کے لیے لیموں سے بہتر کوئی انتخاب نہیں ہوسکتا۔ اس مقصد کے لیے نہانے سے صرف ایک گھنٹہ قبل لیموں کے رس کی مناسب مقدارکو اپنے بالوں پر لگائیں۔

لیموں کا رس کیمیائی مصنوعات کے برعکس آپ کے بالوں کو بتدریج، محفوظ طریقے اور قدرتی طور پر ہلکا کرے گا۔ آپ اسے  ہفتے میں دو بار استعمال کر سکتے ہیں تاہم حساس جلد والے افراد اسے استعمال کرنے سے قبل اس کا پیچ ٹیسٹ ضرور کر لیں۔

قدرتی ڈیوڈورینٹ

لیموں ایک مخصوص مہک لیے  قدرتی طورپر جراثیم کش خصوصیات رکھتا ہے۔ قدرتی گھریلو ڈیوڈورینٹ بنانے کے لیے، ایک لیموں کا رس لیں، اب اس میں تھوڑا سا دلیا اور ایک چمچ شہد ملا کر اچھی طرح مکس کریں پھر اس پیسٹ کو جہاں پسینہ زیادہ آتا ہو لگائیں۔

حیرت انگیز طورپر اس پیسٹ کو اسکرب یا ماسک کے طور پر بھی استعمال کیا جاسکتا ہے۔