موسم سرما میں خشک اور سرد ہواؤں کی بدولت جلد اپنی نمی کھونے لگتی ہے یہی وجہ ہے کہ اسے دیگر موسموں کی نسبت زیادہ توجہ کی ضرورت ہوتی ہے۔

ایک عام رویہ ہے کہ لوگوں کی اکثریت چہرے اور ہاتھوں کی جلد کی تو دیکھ بھال کرتی ہیں تاہم پیروں کو نظر انداز کردیا جاتا ہے جس کے نتیجے میں پیرکی جلد خشک ہوکر پھٹنے لگتی ہیں اور سب سے زیادہ ایڑھیاں متاثر ہوتی ہیں۔

موجودہ زمانے میں پیروں کے صفائی اور دیکھ بھال کے لیے سیلون میں پیڈیکیورکیا جاتا ہے جو کہ  کافی مہنگا ثابت ہوتا ہے اور اسے گھر پر کیا جائے تب بھی اس میں استعمال ہونے والی مصنوعات کافی مہنگی ہوتی ہیں۔

تاہم گھرپرموجود قدرتی اشیاء سے نہ صرف پیروں کی دیکھ بھال کا کام سرانجام دیا جاسکتا ہے بلکہ پھٹی ایڑھیوں سے بھی چھٹکارا حاصل کیا جاسکتا ہے جوکہ ایک تکلیف دے مسئلہ ہے۔

یہاں پرپھٹی ایڑھیوں کے لیے چند بہترین طریقے پیش کیے جارہے ہیں جو آپ کو اس مسئلے سے نجات دے کرآپ کے تلوؤں کی جلد کو نرم وملائم بنانے میں مدد گار ثابت ہوں گے۔

پھٹی ایڑھیوں کے لیے علاج کے لیے چند آزمودہ  طریقے

گرم پانی سے علاج

اس مقصد کے لیے جو اجزاء درکار ہیں ان میں 2 کھانے کے چمچ بیکنگ سوڈا، 2 کھانے کے چمچ نمک، جھانواں اور گرم پانی شامل ہیں۔

ہدایات:

پہلے مرحلے میں ایک برتن میں نیم گرم پانی ڈال کر اس میں نمک اور بیکنگ سوڈا شامل کرکے اچھی طرح ہلائیں اب اس میں  اپنے پیروں کو15 منٹ کے لیے بھگودیں، 15 منٹ کے بعد پیروں کو خشک کر کے جھاوے کی مدد سے ایڑھیوں کو نرمی سے رگڑیں تاکہ اس پر موجود پٹھی ہوئی جلد صاف ہوجائے۔

دوسرے مرحلے میں 2  کھانے کے چمچ  کوئی بھی تیل لے کر اس میں 1 کھانے کا چمچ چینی شامل کریں۔

اس مرکب کو کم از کم 5 منٹ تک استعمال کرتے ہوئے اپنی ایڑیوں اور پیروں کو آہستہ سے رگڑیں۔

نیم گرم پانی سے اپنے پیروں کو دھولیں۔

تیسرے مرحلے میں پیروں کو موئسچرائزکریں۔ اس مقصد کے لیے موم اور زیتون کے تیل کو استعمال کریں۔ سب سے پہلے موم کو گرم پانی کے پیالے کے اوپر رکھ کر گرم کریں تاکہ وہ پگھل جائے اب اس میں زیتون کا تیل شامل کر کے اچھی طرح مکس کریں اس مرکب کو پیروں پرخصوصاً پھٹی ایڑھیوں پرلگائیں اور موزے پہن کر سو جائیں صبح پھٹی ایڑھیاں بلکل ٹھیک ہوجائیں گی۔