زیرہ  کا استعمال صدیوں سے کھانوں میں بطور مصالحے اور خوشبو کے لیے کیا جاتا رہا ہے تاہم اس میں ایسے صحت بخش اجزاء جیسے اینٹی آکسیڈینٹس، پروٹین، چکنائی، کاربوہائیڈریٹ، کیلشیم، کاپر، آئرن، میگنیشیم، میگنیز، فاسفورس اور پوٹاشیم پائے جاتے ہیں جو آپ کی مجموعی صحت کو برقرار رکھ کرکئی امراض سے تحفظ فراہم کرتے ہیں۔

زیرہ نہ صرف آپ کو صحت مند رکھتا ہے بلکہ یہ آپ کی جلد کے بھی کئی مسائل حل کرنے کی بھرپور صلاحیت رکھتا ہے۔

یہاں پراس چھوٹے سے دانے کے حیرت انگیز فائدے پیش کئے جارہے ہیں۔

قوت مدافعت میں اضافہ

زیرہ میں موجود اینٹی آکسیڈینٹ آپ کے مدافعتی نظام کومضبوط بنانے میں مددفراہم کرتے ہیں اس طرح جسم حملہ آور بیکٹیریا، وائرس، فنگس اورجراثیم سے محفوظ رہتا ہے۔

انیمیا کا مؤثر علاج

زیرہ آئرن سے بھرپور ہوتا ہے، جو خون کے سرخ خلیوں کی پیداوار کے لیے ایک اہم معدنیات ہے۔ اسی لیے زیرہ پر مشتمل پکوانوں کو غذا میں شامل کرنا خون کی کمی کو دور کرنے کا ایک ذائقہ دار طریقہ ہے خاص کر آئرن کی کمی جو جسم میں انیمیا کا سبب بنتی ہے۔

کینسر سے تحفظ

طبی حکام کے مطابق زیرہ میں موجود بعض مرکبات بہترین اینٹی کینسر ایجنٹ کے طور پر کام کرتے ہیں۔ مطالعات سے پتہ چلتا ہے کہ یہ مرکبات خاص طور پر چھاتی اور بڑی آنت کے کینسر کو روکنے میں معاو ن ثابت ہوتے ہیں۔

عام سردی کا علاج 

موسم سرما میں ہونے والے نزلہ وزکام سے بچنے کے لیے ریرہ ایک بہترین علاج ثابت ہوسکتا ہے۔ اس کی بنیادی وجہ اس میں موجود وٹامن سی ہے جو اس کیفیت کو دور کرنے میں اہم کرادار ادا کرتاہے۔ اس مقصد کے لیے زیرہ کی زائد مقدار سوپ اور اسٹومیں شامل کر کے استعمال کی جاسکتی ہے تاکہ زکام سے فوری راحت مل سکے۔

بدہضمی روکنے والا

زیرہ کو پیٹ کے امراض خاص کرہاضمہ کے لیے بہترین تصور کیاجاتا ہے بد ہضمی کی صورت میں ایک چائے کا چمچ ایک کپ ابلتے پانی میں کچھ دیر کے لیے بھگودیں پھر اسے چھان کر وقفے وقفے سے استعمال کریں اس طرح بد ہضمی ختم ہوجائے گی۔ جبکہ اسہال میں اس کی چائے بھی کافی افادیت رکھتی ہے۔

سانس کی بدبو اور منہ کے زخم کا بہترین علاج

اوپر بتائے گئے زیرے کی چائے کو مکمل طور پر ٹھنڈا کر کے استعمال کرنے سے منہ سے آنے والی ناگوار مہک دور ہوجاتی ہے  ساتھ ہی اس چائے میں نمک کی کچھ مقدار ملا کرغرارے کرنے سے منہ میں ہونے والے زخموں، مسوڑھوں اورگلے کی سوزش دور کرنے میں مدد ملتی ہے۔

جلد کے لیے

پھوڑے پھنسی سے نجات  

اس مقصد کے لیے زیرے کو سرکے کے ساتھ ملا کر متاثرہ جگہ پر لگانے سے حیرت انگیز نتائج سامنے آتے ہیں کیونکہ اس مکسچر میں بہترین اینٹی مائیکروبائل خصوصیات موجود ہوتی ہیں جو بیکٹیریا کو ختم کرنے اور جلد کی مذکورہ حالت کے علاج کو تیز کرنے میں مدد گار ثابت ہوتی ہیں۔

پمپل اور ایکنی

یہ بات تو سب ہی جانتے ہیں کہ زیرہ میں وٹامن ای موجود ہوتا ہے جس میں زبردست اینٹی آکسیڈینٹ اور سوزش کو دور کرنے کی خصوصیات پائی جاتی ہیں، اس لیے ایکنی اور مہاسوں سے نمٹنے کے لیے اس مصالحے کا استعمال کیا جا سکتا ہے۔ جلد کے ان مسائل سے نجات کے لیے زیرے میں پانی کے چند قطرے ڈال کر  ایک گاڑھا سا پیسٹ بنائیں اور اسے ایکنی اور مہاسوں پر لگائیں اور خشک ہونے پر پانی سے دھولیں۔

عمر رسیدگی کے اثرات

زیرے میں اینٹی آکسیڈنٹس کی کثیر مقدار پائی جاتی ہے جوعمررسیدگی کے اثرات جیسے جھریوں اور جھائیوں کو دور کرنے میں معاون ثابت ہوسکتی ہے اس مقصد کے لیے ناریل کے تیل اور پسے ہوئے زیرے سے بنا ماسک چہرے اور گردن پر بھی لگایا جاسکتا ہے۔

خارش میں کمی

موسم سرما میں خشک جلد پر اکثر خارش ہونے لگتی ہے تو ایسی صورت میں زیرہ سے فائدہ اٹھایا جاسکتا ہے۔ کسی بڑے برتن میں پانی لے کراس میں زیرہ دال ابال لیں اب اس پانی کو نہانے کے پانی میں شامل کرکے متاثرحصے کو اس میں کچھ دیر کے لیے ڈبو کر رکھیں یہ خارش کا سب سے مؤثر علاج ہے۔