سر درد ہفتے میں ایک یا دو بار تو ہو ہی جاتا ہے اور اس کو ختم کرنے کیلئے مختلف ادویات کا استعمال کیا جاتا ہے لیکن ان ادویات کا زیادہ استعمال نقصان دہ بھی ہو سکتا ہے۔

سر درد کی مختلف وجوہات ہوسکتی ہیں، انہی میں سے کچھ کا ذکر آج ہم کریں گے اور اگر آپ ان وجوہات کا سدباب کریں تو اس بیماری سے چھٹکارا حاصل کر سکتے ہیں۔

اسکرین کے زیادہ استعمال سے ہونے والا سر درد

آج کل کے جدید دور میں زیادہ تر لوگ اپنا وقت اسکرین کے سامنے بیٹھ کر گزارتے ہیں جس کے باعث سر درد ہوتا ہے اور بینائی کمزور ہوتی ہے۔

اسکرین کے سامنے زیادہ دیر بیٹھنے سے ہونے والے سر درد کو کمپیوٹر وژن سر درد کہا جاتا ہے، اس کی وجہ وہ تیز روشنی ہے جس کا آپ مسلسل سامنا کرتے ہیں۔

  کمپیوٹر کے زیادہ استعمال سے نہ صرف سر درد ہوتا ہے بلکہ دھندلا پن یا دوہرا وژن جسے بھینگا پن بھی کہا جاتا ہے، آنکھوں میں سرخی کا آجانا، تھکاوٹ اور گردن میں درد بھی ہوتا ہے۔

ان تمام درد اور تکلیف سے بچنے کا حل یہ ہے کہ آپ زیادہ وقت اسکرین کے سامنے نہ گزاریں اور اگر مجبوری ہے تو پھر ہر تھوڑے ٹائم بعد وقفہ لیں۔

جائنٹ سیل آرٹرائٹس سر درد

اگر سر درد کے ساتھ ساتھ جبڑوں میں بھی درد محسوس ہو تو اس کا مطلب ہے کہ آپ کو جائنٹ سیل آرٹرائٹس سر درد ہے، ایسی صورت میں اگر آپ درست ادویات کا استعمال کرتے ہیں تو اس کا علاج ممکن ہے۔

 سروائیکو جینک سر درد

اگر اپ کا سر درد گردن اور کھوپڑی کے درمیان سے شروع ہوتا ہے تو یہ سروائیکو جینک سر درد ہوسکتا ہے، اس درد کے ساتھ جو علامات سامنے آتی ہیں ان میں گردن کے درمیان میں درد ہونا، جکڑن محسوس ہونا، گردن کے پٹھوں میں تکلیف ہونا، سینے کے پٹھوں میں تناؤ اور کندھوں کے ایک حصے میں سختی محسوس ہونا شامل ہے۔

یہ سر درد اس وقت ہوتا ہے جب آپ ایک ہی پوزیشن میں زیادہ تر وقت جھکے رہتے ہیں جس کے نتیجے میں جنکشن جام ہوجاتا ہے۔

اس درد سے چھٹکارا حاصل کرنے کا ایک ہی حل ہے اور وہ ہے مساج، اگر آپ اس قسم کے درد کا شکار ہیں تو مساج کریں گے تو ٹھیک ہو جائیں گے۔