کہتے ہیں کہ جوڑے آسمانوں پر بنتے ہیں اور زمین پر ملتے ہیں، اس طرح دومختلف مزاج کے افراد ایک ساتھ زندگی کے سفر کا آغاز کرتے ہیں۔

شادی اپنی پسند کی ہو یا والدین کی پسند کی، پہلے سے کوئی منصوبہ بندی نہیں جاتی کہ زندگی کو کیسے آگے بڑھانا ہے یہی وجہ ہے کہ کچھ ماہ یا سال بعد یہ تعلق اس نہج پر پہنچ جاتا ہے جس میں ایک دوسرے کے ساتھ اختلافات جنم لینے لگتے ہیں۔

تاہم چند چھوٹی باتوں یا عادات کو اپنا کرآپ اس رشتے کوایک نئے رنگ میں ڈھال سکتے ہیں یا شریک حیات کو احساس دلا سکتے ہیں کہ آپ کو ان کی کتنی پروا ہے۔

چند سادہ مگر حیران کن اقدامات آپ کے شریک حیات کے چہرے پر مسکراہٹ لانے کے لیے کافی ثابت ہوتے ہیں جو کہ درج ذیل ہیں۔

گھر کا کوئی کام کردینا

اچانک گھر کا کوئی کام کردینا آپ کے شریک حیات کو خوشگوار حیرانی میں ڈال سکتا ہے ۔

میسج کے بجائے فون کردیں

موجودہ عہد میں اکثر لوگ بات کرنے پر ٹیکسٹ میسج کو ترجیح دیتے ہیں مگر کال کرنا اس کے مقابلے میں دل جیتنے کا زیادہ اچھا طریقہ ہے۔

کہیں جانے کا منصوبہ خود بنائیں

کسی جگہ کھانے کے لیے جانے یا فلم دیکھنے سمیت کسی بھی اس طرح کی چیز پر بحث کرنے کے بجائے خود اس کا منصوبہ بنائیں۔ منصوبہ ایسا بنائیں جو شریک حیات کو پسند آئے

شہر سے باہر جانے پر کچھ لانا نہ بھولیں

شہر سے باہر گھومنے جائیں یا دفتری امور کے باعث جانا ہو، واپسی میں کچھ ایسا ضرور ساتھ لے کر گھر جائیں جو شریک حیات کواحساس دلائے کہ دور ہونے پر بھی آپ کو اس کا خیال تھا۔

کبھی کبھار پسندیدہ کھانا گھر لے آئیں

اگر آپ کو معلوم ہے کہ آپ کے شوہر یا بیوی کو کسی مخصوص جگہ کا کوئی پکوان پسند ہے تو وہاں جانے کا موقع ملنے پراسے لینا نہ بھولیں اور گھر میں غیر متوقع دعوت کردیں ۔

اگر دن خراب گزرا ہے تو کسی چیز سے سرپرائز کریں

ہر ایک کی زندگی میں کچھ دن ایسے ہوتے ہیں جو بھاری ثابت ہوتے ہیں ، جیسے کام میں کوئی مسئلہ ہوگیا اور کوئی بری خبر مل گئی ۔ تو ایسے مواقع پر پھولوں کا گلدستہ یا پسندیدہ آئس کریم اچانک مل جائے تو ہوسکتا ہے چہرے پر مسکراہٹ بکھر جائے۔

دوسرے کے پیاروں کے کام آئیں

شادی کا تعلق صرف دو افراد کے درمیان نہیں بلکہ دو خاندانوں کے درمیان ہوتا ہے اور شوہر ہو یا بیوی، ان کی زندگی میں چند ایسے افراد ضرور ہوتے ہیں جو بہت اہمیت رکھتے ہیں ۔ تو ایسے لوگوں کے کام آنے کی کوشش کریں تاکہ شریک حیات خوش رہے۔