تمام ہی والدین کی یہی خواہش ہوتی ہے کہ ان کے بچوں کا قد چھوٹا نہ رہ جائے، کیونکہ دیکھا گیا ہے کہ جن بچوں کا قد چھوٹا رہ جاتا ہے وہ اسے اپنی خامی سمجھ کر افسردہ رہتے ہیں۔ تاہم ماہرین کے مطابق اگر بچوں کو ابتدا ہی سے متوازن غذا استعمال کرائی جائے تویہ ان میں بنیادی صحت کو بہتر بنانے کے ساتھ قد میں بھی اضافے کا سبب بھی بن سکتی ہیں۔

 قد نہ بڑھنے کی کئی وجوہات ہو سکتی ہیں ان میں سب سے اہم جین کا کردار ہے اگر گھر میں سب کا قد چھوٹا ہے تو ہو سکتا ہے کہ آپ کا بھی قد بھی چھوٹا ہی رہے لیکن ضروری نہیں کہ ایسا ہی ہو،اس کے علاوہ بھی کئی اور عوامل ہیں جن میں متوازن غذا کا نہ ہو نا اورجسمانی سرگرمیوں میں کمی وغیرہ۔ کیلشیم جو کہ ہڈیوں کے لئے بے حد ضروری ہے اس کی عدم موجودگی قد پر اثر انداز ہو گی۔

اسی طرح ورزش، کھیل کود بچوں کی بہتر نشوونما میں اہم کردار ادا کرتے ہیں۔ بچوں کو بچپن ہی سے رسی کودنا سکھایا جائے ساتھ ہی کسی جگہ ہاتھوں سے جھولا جھولنے کو کہا جائے یہ عمل قد بڑھنے میں معاون ثابت ہوتے ہیں۔

بہت سے معاملات میں قد نہ بڑھنے کی وجہ وٹامن کی کمی ہو سکتی ہے. اگرچہ یہ براہ راست قد میں اضافے سے وابستہ تو نہیں ہے تاہم یہ جسمانی نشوونما خصوصاً ہڈیوں کو مضبوط اور صحت مند بنانے میں مدد کر سکتے ہیں۔ لیکن یہ اسی وقت ممکن ہے جب آپ ان ضروری وٹامنز کو غذا میں شامل رکھیں گے۔

 وٹامن ڈی

یہ قد بڑھانے میں سب سے اہم وٹامن ہے جو ہڈیوں کو مضبوط اوران کی گروتھ بڑھانے میں معاون ثابت ہوتا ہے۔ جبکہ اس وٹامن کی کمی ہڈیاں اور دانت کی کمزوری کا باعث بنتی ہے۔

اس وٹامن کو حاصل کرنے کا سب سے سستا اور آسان ذریعہ سورج کی روشنی ہے اس کے علاوہ یہ جن غذاؤں میں کثرت سے موجود ہوتا ہے ان میں دودھ ، سیریل، چکنائی والی مچھلی اور مشروم شامل ہیں

۔ وٹامن ڈی جسم کو فاسفورس اور کیلشیم کو مؤثر طریقے سے جذب کرنے میں مدد دے کر قد میں اضافے کا باعث بنتا ہے اس طرح یہ واحد وٹامن ہے جو قد بڑھانے میں براہ راست اثر انداز ہوتا ہے۔

وٹامن بی 3

یہ بھی ایک اہم وٹامن ہے جو قد بڑھانے کے ساتھ  ہڈیوں، جلد، بالوں اور ناخنوں کی نشوونما میں کلیدی کردارادا کرتا ہے۔ یہ جن غذاؤں میں پایا جاتا ہے ان میں انڈے، مچھلی، دودھ اور سبز پتوں والی سبزیاں شامل ہیں

وٹامن سی

وٹامن سی ہڈیوں اور دانتوں کو مضبوط بنانے اور ان کی نشوونما کو فروغ دینے میں مددفراہم کرتا ہے۔ یہ ایک بھرپور اینٹی آکسیڈینٹ ہے جو قوت مدافعت کو بڑھانے اور بیماری سے تحفظ فراہم کرتا ہے۔ یہ وٹامن جن غذاؤں میں پایا جاتا ہے ان میں ترش پھل آلو، ٹماٹراور بیریاں شامل ہیں۔

کیلشیم

کیلشیم سب سے اہم معدنیات میں سے ایک ہے جو جسم کو ہڈیوں کی نشوونما کو بڑھانے اور بہتر بنانے کے لیے درکار ہے۔ کیلشیم کا باقاعدہ استعمال آپ کی ہڈیوں کی عمراور مضبوطی کو بڑھانے میں معاون ثابت ہوتا ہے۔ کیلشیم  دودھ اور دیگر ڈیری مصنوعات میں بکثرت پایا جاتا ہے۔