سردیوں کی آمد کافی مختلف اور سنسنی خیز ہوتی ہے تاہم خشک اور ٹھنڈی ہوا انسانی جلد کے لیے پریشان کن حالات پیدا کردیتی ہے۔

تو آج ہم آپکو بتائیں گے کہ موسمِ سرما میں نہانے کے بعد جلد کی خشکی کو کیسے دور کیا جائے۔

نہانے سے قبل جلد پر مساج کریں

نہانے سے قبل جلد پر کسی بھی تیل سے جس میں سرسوں کا، ناریل کا یا زیتون کا تیل شامل ہے ہلکے ہاتھوں سے مساج کر لیں۔

اس کے بعد نہا لیں، اس سے جلد کی قدرتی چکنائی کو محفوظ رکھا جاتا ہے اور جسم نہانے کے بعد خشکی کا شکار نہیں ہوگا۔

زیادہ دیر تک نہانے سے پرہیز کریں

سردی کے موسم میں نہانے کے لیے ایک جانب تو بہت گرم پانی کا استعمال نہ کریں کیوں کہ بہت گرم پانی جلد کی قدرتی چکنائی کو ختم کر کے جلد کو خشک اور بے رونق کر دیتا ہے اس لیے نہانے کے لیے نیم گرم پانی لیں۔

یہ بھی پڑھیں: سردیوں میں نکھری اور بے داغ جلد کیسے پائیں؟

اس کے علاوہ بہت دیر تک نہانے سے بھی جلد خشک ہو جاتی ہے اس لیے زیادہ دیر تک نہانے سے احتیاط برتیں۔

نہانے کے بعد باڈی لوشن کا استعمال کریں

نہانے کے بعد جسم کو تولیے سے رگڑ کر صاف نہ کریں بلکہ اس کو ہلکے ہاتھوں سے خشک کریں اور جسم کو خشک کرنے کے بعد جسم پر باڈی لوشن لازمی لگا لیں اس سے جسم پر ہونے والی خشکی کا خاتمہ ہو جائے گا اور جلد نرم و نازک ہو جائے گی۔

غذا کے ذریعے خشکی کا خاتمہ

اس موسم میں مچھلی کا استعمال زیادہ کریں کیوں کہ اس میں اومیگا تھری فیٹی ایسڈ ہوتا ہے جو کہ جلد کو چکنا اور تازہ رکھتا ہے۔

یہ بھی پڑھیں: بالوں کی خشکی دور کرنے کے گھریلو ٹوٹکے؛ جانیے

اس کے علاوہ دودھ کو روزانہ سونے سے قبل پینے کی عادت اپنائيں اس سے بھی قدرتی چکنائی میں اضافہ ہو گا۔

پانی کا استعمال

عام طور پر لوگ سردی میں کم پانی پیتے ہیں جلد کی خشکی کا ایک سبب یہ بھی ہوتا ہے جلد کو تازہ دم رکھنے کے لیے پانی کی حیثیت ایک ٹانک سی ہوتی ہے اس وجہ سے سردی کے موسم میں بھی پانی کا استعمال زيادہ کریں تاکہ زہریلے مادے آسانی سے خارج ہو سکیں اور جلد تازہ رہے۔