مرد ہو یا خواتین چہرے کے نقوش کتنے ہی خوبصورت کیوں نہ ہواگر چہرے پر داغ دھبے اور جلد ایک ٹون میں نہ ہوتو چہرہ کا حسن ماند پڑجاتا ہے۔

جلد کا ایک ٹون میں نہ ہونا ایک بہت ہی عام اور جلد کی ایک بے ضررحالت ہے، جس میں جلد کے کچھ حصے اپنی اصل رنگت سے کچھ گہرے ہوجاتے ہیں اس  طرح جسم کے ساتھ چہرے کی جلد پر داغ دھبے سے نمودار ہونے لگتے ہیں۔

جلد کے کچھ حصوں کی رنگت گہری ہوجانے کی اصل وجہ میلانن ہے جو اس جگہ پرزائد مقدار میں جمع ہوجاتا ہے، تاہم اس کی دیگر وجوہات بھی ہیں۔

جلد پر داغ دھبوں کی وجوہات

سورج کی روشنی میں وقت گزارنا

دھوپ اس مسئلے کی بنیادی وجہ ہے، جب آپ سورج کی روشنی میں وقت گزارتے ہیں توجلد ضرورت سے زیادہ میلانین پیدا کرتی ہے یہ ایک ایسا جز ہے جو آپ کی جلد، آنکھوں اور بالوں کی رنگت کا ضامن ہے۔ یہ جتنا زیادہ ہوگا رنگت اتنی ہی گہری ہوگی۔

یہ جزیو وی شعاعوں کو جذب کرتا ہے جو بالآخر آپ کی جلد کے خلیات کو نقصان پہنچاتے ہیں، اس طرح سورج  کی روشنی کا براہ راست سامنا کرنے والی جلد کی رنگت گہری ہوجاتی ہے اور پھر جلد ایک ٹون میں نہیں رہتی۔

سوزش کے بعد ہائپر پگمنٹیشن

آپ کی جلد کے کسی بھی حصے میں مسلسل زخم کا ہونا یا ایکنی اور مہاسوں کا مستققل رہنا بھی جلد پر داغ دھبوں کا باعث بنتا ہے جس سے جلد کے کچھ حصوں کی رنگت گہری ہوجاتی ہے۔

ہارمونل تبدیلیاں

حمل کے دوران یا مانع حمل ادویات کا استعمال ہارمونز میں عدم توازن کا باعث بنتا ہے جس سے میلانین کی زیادہ پیداوارمیں اضافہ ہوسکتا ہے اس حالت کو میلاسما کہا جاتا ہے، اس طرح آپ کی جلد ناہمواردکھائی دیتی ہے۔ تاہم غیر معیاری میک اپ یا منشیات کا استعمال بھی میلاسما کا سبب بن سکتا ہے۔

بڑھتی عمر

عمر بڑھنے کے ساتھ جلد کی رنگت بھی متاثر ہونے لگتی ہے۔ چہرے اورجسم کے دیگر حصوں پر عمر سے متعلقہ دھبے پڑ جاتے ہیں۔

یہ جلد کے ایک ٹون میں نہ ہونے کی بنیادی وجوہات ہیں تاہم اسے آسانی سے دور کیا جاسکتا ہے جس کے لیے صبر شرط ہے۔ کیونکہ اسے دور کرنے کا کوئی بھی طریقہ اپنایا جائے اس کے نتائج سامنے آنے میں وقت لگے گا تو اسے دور کرنے کے لیے کوئی بھی طریقہ  کم از کم چند مہینوں تک جاری رکھیں۔

یہاں پر اس مقصد کے لیے کچھ قدرتی گھریلو علاج پیش کئے جارہے ہیں جو جلد کے داغ دھبوں کو دور کر کے آپ کی جلد کو ایک ٹون میں لے آئیں گے۔

دودھ، بیسن اور بیکنگ سوڈا

اس مکسچر کو بنانے کے لیے دو چائے کے چمچ بکری کا دودھ، ایک چائے کا چمچ بیسن اور ایک چائے کا چمچ بیکنگ سوڈا درکار ہے۔

ایک پیالی میں ان تمام اجزاء کو اچھی طرح مکس کریں اور چہرے پر لگائیں، خشک ہونے پرٹھنڈے پانی سے چہرہ دھولیں۔

بکری کا دودھ غیر معمولی طور دودھ کی دیگر اقسام کی نسبت جلد کے لیے بہترین ہے اس کی وجہ اس کا پی ایچ لیول ہے جوآپ کی جلد کے قریب ترین

ہے۔ اس میں لییکٹک ایسڈ موجود ہوتا ہے، جسے ہلکا ایکسفولییٹر کہا جاتا ہے۔ بیسن جلد کو صاف کرنے، ٹیننگ کو کم کرنے اور جلد کے رنگ کو ہلکا کرنے میں مدد کرتا ہے۔

  لیموں، چینی، اور ناریل کے تیل کا اسکرب

اس اسکرب کو بنانے کے لیے جو اجزاء درکار ہیں ان میں ایک چائے کا چمچ ناریل کا تیل، ایک کھانےکا چمچ پسی دار چینی اور آدھا چائے کا چمچ لیموں کارس شامل ہے۔

ایک پیالی میں تمام اجزاء کو مکس کریں، اب اس اسکرب کو اپنے چہرے پرلگاکر ہلکے ہاتھ سے مساج کریں لیکن آنکھوں کے اردگرد لگانے سے گریز کریں۔ خشک ہونے پر نیم گرم پانی سے دھولیں۔

لیموں کے رس میں موجود اجزاء جلد کے داغ دھبوں کو دور کرنے میں اپنی مثال نہیں رکھتے اس طرح جلد ایک رنگت میں آجائے گی۔ جبکہ دارچینی جلد پر جمی کھردری جلد کو صاف کرنے اور ناریل کا تیل جلد کو نمی فراہم کرنے میں مددفراہم کرے گا۔