جیسا کہ سردیاں آتے ہی لوگ اپنے کمبل نکال لیتے ہیں لیکن اس کا گہری نیند سے کیا تعلق ہے، ہم آپ کو بتائیں گے۔

اس حوالے سے کی جانے والی تحقیق جرنل آف سلِیپ ریسرچ میں شائع ہوئی ہے۔

سوئیڈن کی اُپسالا یونیورسٹی میں کی جانے والی ایک تحقیق کے مطابق وزنی کمبل گہری اور آرام دہ نیند کا سبب بننے والے ہارمون کی پیداوار میں اضافہ کرتے ہیں۔

محققین کو تحقیق کے ذریعے معلوم ہوا کہ وہ لوگ جنہوں نے سوتے وقت وزنی کمبل اوڑھا ان میں ایک عام کمبل اوڑھنے والوں کی نسبت میلاٹونِن کی سطح 30 فیصد سے زیادہ تھی۔

میلاٹونِن ہارمون دماغ کے جانب سے قدرتی طور پر ہر رات خارج کیا جاتا ہے تاکہ کسی شخص کو تھکا ہوا محسوس کروا سکے اور ہماری اندرونی گھڑی کو ترتیب دے سکے۔

وزنی کمبل عصبی نظام کو آرام دہ کرتا ہے، بے چینی کی کچھ علامات جیسے کہ دل کی تیز دھڑکن یا تیز سانس کو کم کرتا ہے، اور جب آپ تناؤ میں ہوتے ہیں تو آپ کا دل تیزی سے دھڑکتا ہے جو میلاٹونِن کی پیداوار کو روکتا ہے۔

اس تحقیق میں 26 افراد کا دو راتوں تک معائنہ کیا، ایک رات میں شرکاء وزنی کمبل اوڑھ کر سوئے جبکہ دوسری رات انہوں نے معمول کی چادر استعمال کی۔

تحقیق میں استعمال کیے جانے والے کمبلوں کے وزن کا موازنہ شرکاء کے وزن سے کیا گیا، کمبلوں کا وزن شرکاء کے وزن کا 12.2 فیصد تھا جبکہ معمول کی چادروں کا وزن 2.2 فیصد تھا۔

تحقیق میں شریک افراد رات 10 بجے کے قریب سو گئے اور 11 بجے تک ہر 20 منٹ کے وقفے پر ان کے لعاب کا نمونہ لیا گیا۔

اس تحقیق کے نتائج میں معلوم ہوا کہ گھنٹے کے آخر میں وزنی کمبل اوڑھ کر سونے والوں میں میلاٹونِن کی پیداوار 32 فیصد زیادہ ہوئی تھی۔