شملہ مرچ کو تمام ہی سبزیوں میں سب سے ورسٹائل سبزی کہاجاتا ہے یہ پکوانوں کی زینت بڑھا کر اسے ایک نیا اور منفرد ذائقہ فراہم کرتی ہے۔

یہ کرکری سبزی کئی رنگوں میں پیدا ہوتی ہے اور ہررنگ مختلف خصوصیات کا حامل ہونے کے ساتھ صحت کے لیے مختلف طرح سے فائدہ مند ثابت ہوتا ہے۔ تاہم بازار میں ہر جگہ یہ سبز رنگ میں دستیاب ہوتی ہے۔

سبز رنگ کی شملہ مرچ میں طاقتور اینٹی آکسیڈنٹس کے علاوہ وٹامن اے، بی کمپلیکس اور سی کثیر مقدار میں موجود ہوتے ہیں۔ جو جسم میں آزاد ریڈیکلز کے مضر اثرات کو متوازن کرنے اورآپ کی مجموعی صحت کو برقرار رکھنے میں مددفراہم کرتے ہیں۔

ہری شملہ مرچ میں اینٹی سوزش خصوصیات پائی جاتی ہیں جو ہڈیوں کے شدید امراض جیسے اوسٹیو ارتھرائٹس جسے گھٹیا کہتے ہیں سے منسلک درد اور سوجن کو دور کرنے میں انتہائی اہم کردار ادا کرتی ہے۔

ہری شملہ مرچ دمہ کے مریضوں کے لیے کسی مسیحا سے کم نہیں ہے کیونکہ اس میں فائٹونیوٹرینٹس کی کثیر مقدار پائی جاتی ہے جوسانس لینے میں دشواری کو دور کرنے میں اہم کردارادا کرتا ہے۔

اس میں نارنگی سے زیادہ وٹامن سی موجود ہوتا ہے جو امراض قلب سے تحفظ فراہم کرتا ہے۔

 اگر آپ صحت مند غذا کے ساتھ سبز شملہ مرچ کا استعمال بڑھاتے ہیں تو آپ آسانی سے اپنی بڑی آنت کو جرثوموں اور زہریلے عناصر کے نقصان دہ اثرات سے بچا سکتے ہیں۔ اس طرح یہ بڑی آنت کے کینسر کے خطرات کو کم کرنے میں اہم کردار ادا کرتی ہے۔

ہری شملہ مرچ میں وٹامن بی 6 کی زیادہ مقدارقوت مدافعت بڑھانے سے لے کر اعصابی نظام کو درست رکھنے تک معاون ثابت ہوتی ہے۔

جبکہ کیلشیم سے بھرپور ہونے کی وجہ سے یہ ہڈیوں اور دانتوں کو مضبوط اور صحت مند رکھنے میں مد دیتی ہے۔

  ہری مرچ کی اینٹی آکسیڈنٹ خصوصیات انہیں آزاد ریڈیکلز کی وجہ سے ہونے والے آکسیڈیٹیو نقصانات کے خلاف انتہائی موثر بناتی ہیں۔ سبز شملہ مرچ میں موجود مختلف اینٹی آکسیڈنٹ، وٹامنز، خاص طور پر وٹامن سی جلد میں کولیجن کی تشکیل میں مددگارثابت ہوتے ہیں اس طرح یہ جلد کی لچک میں اضافے کا سبب بنتے ہیں ساتھ ہی عمر رسیدگی کے اثرات کو دورکر کے جلد کو جواں بناتے ہیں۔

اس میں موجود فائٹونیوٹرینٹس دانے، داغ دھبوں، مہاسوں اور جلد کے دیگر انفیکشن سے تحفظ فراہم کرتے ہیں۔

سبز شملہ مرچ  قدرتی سلکان حاصل کرنے کا بہترین ذریعہ ہے جو کہ بالوں کے لیے مفید تصور کیا جاتا ہے ۔

جب آپ روزمرہ کی خوراک میں اس مرچ کو شامل رکھتے ہیں تو یہ آپ کے سر اور بالوں کی جڑوں میں دوران خون کو بڑھا کر بالوں کی نشوونما کے قدرتی محرک کے طور پر کام کرتا ہے اوراس طرح آپ کے بالوں کو تیزی سے لمبا کرنے میں مدد مل سکتی ہے۔ اس طرح بالوں کے گرنے کا بڑا مسئلہ سبز شملہ مرچ کی مدد سے حل کیا جا سکتا ہے۔