آج ہم آپکو صحت مند رہنے کا آسان سا نسخہ بتائیں گے۔

ایک تحقیق کے مطابق دن میں 3 سے 4 بار محض ایک منٹ کی سخت جسمانی سرگرمیوں جیسے دوڑنا، تیز چہل قدمی، بھاری سامان اٹھانا یا تیزی سے سیڑھیاں چڑھنے سے صحت مند اور فٹ رہنے میں مدد مل سکتی ہے۔

اس تحقیق میں یوکے بائیو بینک سے 25 ہزار سے زیادہ افراد کے جسمانی سرگرمیوں کے ڈیٹا کو حاصل کیا گیا اور پھر ان کا جائزہ لگ بھگ 7 سال تک لیا گیا۔

ان میں سے کوئی بھی فرد فارغ وقت میں ورزش کرنے کا عادی نہیں تھا۔

تحقیق سے معلوم ہوا کہ دن بھر میں 3 سے 4 بار دل کی دھڑکن تیز کردینے والی جسمانی سرگرمیوں سے کسی بھی وجہ سے موت کا خطرہ 40 فیصد تک کم ہوجاتا ہے۔

اسی طرح دل کی شریانوں سے جڑے امراض جیسے ہارٹ اٹیک یا فالج وغیرہ سے موت کا خطرہ 50 فیصد تک کم ہوجاتا ہے۔

محققین کا کہنا ہے کہ دن بھر میں 3 سے 4 منٹ کی سخت جسمانی سرگرمیوں کو روزمرہ کے معمولات میں آسانی سے شامل کیا جاسکتا ہے۔

انہوں نے بتایا کہ ایسی سرگرمیوں کو معمول بنانا چاہیے جن سے دل کی دھڑکن کی رفتار تیز ہوجائے۔

ان کا کہنا تھا کہ اس کے لیے کسی تیاری یا خصوصی صلاحیت کی ضرورت نہیں ہوتی بلکہ بس اپنے چلنے کی رفتار تیز کردیں یا گھر کے کام زیادہ پرجوش انداز سے کرکے بھی آپ خود کو فٹ اور صحت مند رکھ سکتے ہیں۔

تحقیق میں یہ بھی دریافت کیا گیا کہ دن بھر میں 11 بار ایک منٹ کے لیے سخت جسمانی سرگرمیوں سے دل کی شریانوں سے جڑے امراض سے موت کا خطرہ 65 فیصد جبکہ کینسر سے 49 فیصد تک کم ہوجاتا ہے۔