موسم سرما میں گرم لباس کیساتھ ساتھ جسم گرم رکھنے کے لئے مخصوص غذا کا استعمال بھی ضروری ہوتا ہے۔

سردیوں کے موسم میں مخصوص کھانے اورمشروبات غذا میں شامل کرنے سے جسم میں گرمائش پیدا کی جا سکتی ہے جو بیرونی ٹھنڈ کو جسم پر اثر انداز ہونے سے بچا تی ہے۔

موسم سرما کا ذکر ہو اور سوپ کا نام نہ شامل ہو یہ تو ممکن ہی نہیں۔

طبی ماہرین کا کہنا ہے کہ سوپ ایک بھرپور غذا ہے جو افادیت کے لحاظ سے لاجواب اور جسمانی کمزوری اور بیماری میں بطور توانا غذا ہے۔

موسم سرما کے اثرات سے محفوظ رہنے یا سردی کے اثرات کو زائل کرنے کے لیے یا سینے کا بلغم اور گلے کی خراش دور کرنے کے لیے  مرغی کے سوپ میں انڈا شامل کرکے بھی بہت استعمال کیا جاتا ہے ۔

طبی ماہرین کا کہنا ہے کہ دیسی مرغی سے تیار کردہ یخنی بچوں، بوڑھوں کو توانائی بخشنے کے ساتھ بیمار اور کمزور لوگوں کی قوت بحال کرنے کے لیے بے حد مفید ہے۔

 ضروری نہیں کہ سوپ کو صرف گوشت کے ساتھ تیار کیا جائے بلکہ سبزیوں سے تیار کردہ سوپ بھی انتہائی لذیذ اور قوت بخش ہوتا ہے۔

 ایک سبزی کے بجائے 3 چار سبزیاں ملاکر سوپ تیار کیا جائے تو اس کی غذائی افادیت میں کئی گنا اضافہ ہو جاتا ہے۔

ماہرین کے مطابق سبزیوں سے تیار کردہ سوپ بچوں کی بھوک بڑھانے کے لیے بھی بے حد مفید ہے۔

ہفتے میں تین مرتبہ مختلف سبزیوں کا سوپ ان کی جسمانی نشوونما میں بھرپور کردار ادا کرتا ہے اور بچوں کے لیے  دال کا سوپ بھی ایک مکمل غذا کے طور پر استعمال کیا جا سکتا ہے۔

سوپ میں مکئی کے دانے شامل کیے جائیں تو جہاں سوپ کا مزہ دوبالا ہو جاتا ہے وہیں سوپ کی افادیت بھی کئی گنا بڑھ جاتی ہے کیونکہ مکئی کے دانوں میں وٹامن کا خزانہ موجود ہے۔

چکن سے بنے سوپ میں مکئی اور سبزیوں کو شامل کر کے ایک پیٹ بھرنے والی مکمل غذا تیار کی جا سکتی ہے جس میں وافر مقدار میں ریشہ پایا جاتا ہے۔

طبی ماہرین کے مطابق سوپ نظام ہاضمہ کی خرابیوں کو دور کرنے کے لیے  بھی کار آمد ہے اور یہ بھوک بڑھاتا ہے، جلد ہضم ہو جانے والی غذا ہے۔

سوپ قبض اور گیس کے مریضوں کے لیے لاجواب ہے جبکہ بلڈ پریشر، کولیسٹرول، ذیابیطس کے مریضوں کے لیے سوپ دوا اور غذا دونوں کا کام کرتا ہے۔

ماہرین کے مطابق سوپ بخار، نمونیہ اور فلو کے مریضوں کے جسم سے سردی کے اثرات کو ختم کرنے اور انہیں توانائی فراہم کرنے والے ٹانک کا بھی کام کرتا ہے۔

اس کے ساتھ سوپ ہڈیوں، جوڑوں اور پٹھوں کو طاقت فراہم کرنے اور درد سے بھی آرام پہنچاتا ہے ۔

سوپ گلے کی سوزش، خراش اور حلق کے ورم کو دور کر کے سینے کی جکڑن اور بلغم کو صاف کرکے مریض کو آرام اور سکون پہنچاتا ہے۔