چہرے کی جلد اگر صحت مند ہوگی تو یہ ہموارچمکتی ہوئی دکھائی دے گی تاہم غیر متوازن غذا، نیند کی کمی اسٹریس اور آلودگی کی وجہ سے اس پر داغ دھبے اور چھائیاں نمودار ہونے لگتی ہیں۔

خواتین کی کثیر تعداد اس مسئلے کے حل کے لیے مختلف مصنوعات استعمال کرتی ہیں تاہم اس سے نجات کے لیے کچھ گھریلو طریقے بھی نہایت کار آمد ثابت ہوتے ہیں۔

ایسا ہی ایک طریقہ گھر میں موجود عام اجزاء سے تیار کیا جانے والا ایک آمیزہ ہے جسے لیموں، ٹماٹراور شہد کو ملا کر بنایا جاتا ہے۔ اس کی سب سے خاص بات یہ ہے کہ یہ کیمیکلز سے پاک ہونے کے ساتھ چہرے کی جلد کے لیے نہایت موزوں ہے اور اسے کسی بھی وقت چہرے پر لگایا جاسکتا ہے۔

یہ تینوں اجزاء چہرے کے داغ دھبوں اور جھائیوں کو صاف کرنے کے لیے کس طرح مفید ثابت ہوتے ہیں جانتے ہیں۔

لیموں

صحت کا کوئی ایسا مسئلہ نہیں ہے جس کا حل اس پھل میں موجود نہ ہو یہ آپ کے حسن کو مزید بڑھانے میں کسی بیوٹی پراڈکٹ کی طرح کام کرتا ہے اس میں ایسے وٹامن موجود ہوتے ہیں جو جلد کی رنگت کوصاف کرنے اور چھائیوں کو دور کرنے میں معاون ثابت ہوتے ہیں۔

ٹماٹر

ٹماٹر میں اینٹی آکسیڈنٹس ہوتے ہیں جو کہ فری ریڈیکلز سے لڑنے میں مدد کرتے ہیں جو قبل از وقت بڑھاپے کا باعث بنتے ہیں۔ یہ داغ دھبوں اور جلد کی رنگت کو صاف کرنے میں بھی مدد گار ثابت ہوتے ہیں۔ یہ جوان اور چمکدار جلد کو فروغ دیتا ہے۔

شہد

شہد جلد کے خلیوں میں نمی کو برقرار رکھنے میں مدد کرتا ہے۔ اس میں اینٹی بیکٹیریل اور جراثیم کش خصوصیات بھی ہوتی ہیں جو مہاسے پیدا کرنے والے بیکٹیریا کو مارنے میں مدد کرتی ہیں۔

اینٹی بلیمش فیس ماسک تیار کرنے کا طریقہ

اجزاء:

اس آمیزے کو تیار کرنے کے لیے جو اجزاء درکار ہیں ان میں ایک  کھانے کا چمچ شہد،ایک چائے کا چمچ ٹماٹر کا گودااورآدھا چائے کا چمچ لیموں کا رس شامل ہیں۔

ہدایات:

ان تمام اجزاء کو ایک پیالی میں ڈال کراچھی طرح ملاکرچہرے پر لگائیں خشک ہونے پر ٹھنڈے پانی سے چہرہ دھولیں۔