صحت مند رہنے کے لیے جہاں متوازن غذا ضروری ہے تو وہی جسمانی سرگرمیاں بھی خاص اہمیت رکھتی ہیں اور یہ اسی وقت ممکن ہوسکتا ہے جب ہڈیاں مضبوط ہوں۔

 انسانی جسم کی بہتر نشونما کے لئے ہڈیوں کا مضبوط ہونا اولین شرط ہے، عمر بڑھنے کے ساتھ ساتھ جسم میں ہڈیوں کے کمزور ہونے کو ایک قدرتی عمل تصور کیا جاتا ہے۔

اگر آپ چند غذاؤں کا باقاعدگی سے استعمال کریں تو بڑھاپے میں بھی ہڈیوں کو مضبوط رکھا جا سکتا ہے، ہڈیوں کو مضبوط بنانے میں وٹامن ڈی اور کیلشیم بہت اہم کردار ادا کرتے ہیں۔

 روزمرہ کی غذا میں چند پھلوں کو شامل کر کے ایسا ممکن ہوسکتا ہے۔

خشک آلو بخارے

یہ پھل ہاضمے کے لیے بہت زیادہ فائدہ مند ہے مگر یہ ہڈیوں کی صحت کے لیے بھی مفید ہے۔

تحقیقی رپورٹ کے مطابق روزانہ خشک آلو بخارے کھانے سے ہڈیوں کی کمزوری اور حجم میں کمی کی روک تھام ممکن ہوسکتی ہے۔

یہ بھی پڑھیں: جوڑوں کا درد ہو یا ہڈیوں کی کمزوری، دارچینی کو ان 5 طریقوں سے استعمال کریں

خشک آلو بخاروں میں متعدد وٹامنز اور منرلز موجود ہوتے ہیں جو ہڈیوں کے لیے اہم ہوتے ہیں مگر اس کے ساتھ ساتھ یہ پھل ورم کا مقابلہ بھی کرتا ہے جس سے بھی ہڈیوں کی صحت بہتر ہوتی ہے۔

پپیتا

جسم میں وٹامن K کی کمی سے ہڈیوں کی کمزوری اور فریکچر کا خطرہ بڑھتا ہے مگر یہ پھل اس وٹامن کے حصول کا اچھا ذریعہ ہے۔

اس وٹامن کی مناسب مقدار کا استعمال اچھی صحت کے لیے بہت اہم ہوتا ہے کیونکہ اس سے جسم میں کیلشیئم کے جذب ہونے کی سطح بہتر ہوتی ہے۔

گریپ فروٹ

گریپ فروٹ جیسے کھٹے پھلوں میں وٹامن سی کی مقدار کافی زیادہ ہوتی ہے۔

یہ بھی پڑھیں: کھیرا، ہڈیوں کو مضبوط بنانے کے ساتھ خوبصورتی میں بھی اضافہ کرے

وٹامن سی عمر بڑھنے کے ساتھ ہڈیوں کے حجم میں آنے والی کمی کی روک تھام میں اہم کردار ادا کرتا ہے۔

ایک گریپ فروٹ میں 88 ملی گرام تک وٹامن سی ہوسکتا ہے جو دن بھر کی ضروریات کے لیے کافی ہوتا ہے۔

انجیر

انجیر بھی ہڈیوں کو مضبوط بنانے والا پھل ہے۔

تازہ انجیروں میں کیلشیئم اور دیگر اہم غذائی اجزا جیسے پوٹاشیم اور میگنیشم موجود ہوتے ہیں۔

اگر جسم میں میگنیشم کی کمی ہو تو وٹامن ڈی کے توازن کے مسائل کا سامنا ہوتا ہے جس سے ہڈیوں کی صحت متاثر ہوتی ہے۔

اسی طرح پوٹاشیم وہ جز ہے جو تیزابیت کو کنٹرول کرتا ہے جس سے ہڈیوں میں کیلشیئم میں کمی نہیں آتی۔

کیلے

کیلے بھی پوٹاشیم اور میگنیشم کے حصول کا بہترین ذریعہ ثابت ہوتے ہیں۔

ان دونوں کے فوائد کا ذکر اوپر ہوچکا ہے یہی وجہ ہے کہ روزانہ ایک کیلے کو کھانے سے ہڈیوں کو مضبوط رکھنے میں مدد مل سکتی ہے۔

یہ بھی پڑھیں: بہترین نسخہ جو ہڈیوں کے درد ،اعصابی کمزوری اور بلڈ پریشر کیلئے بہت مفید ہے