مشی گن یونیورسٹی کے تحت کی جانے والی ایک تحقیق کے مطابق اگر آپ کی عمر 50 برس سے زائد ہے تو پالتو جانور آپ کے دماغ کی حفاظت میں مدد دے سکتے ہیں۔

دنیا بھر میں اسے افراد کی کمی نہیں ہے جو گھروں میں مختلف جانوروں کو پالتے ہیں ان میں سر فہرست کتے اوربلیاں ہیں تاہم انہیں پالنے سے جہاں انہی دلی خوشی ملتی ہے تو وہی یہ دماغی صحت کے لیے بھی اہم ہیں۔

50  سال سے زیادہ عمر کے امریکی بالغوں کے بارے میں کی گئی حالیہ تحقیق کے مطابق میں جن لوگوں نے پانچ سال سے زیادہ عرصے تک پالتو جانوروں کو پالا تھا انہوں نے جانور نہ رکھنے والوں کی نسبت علمی یادداشت کے ٹیسٹوں میں بہتر اسکور کر کے دکھایا۔

مشی گن یونیورسٹی کے نتائج سے یہ بات سامنے آئی ہے کہ پالتو جانوروں کا اثرآپ کی مجموعی صحت پر پڑتا ہے یہ آپ کی ہمت بڑھانے اوردل کی صحت کو برقراررکھنے کے ساتھ بڑھتی عمر میں دماغی صحت میں بھی کردار ادا کر سکتے ہیں۔

یہ نتائج 2010 سے 2016 تک قومی سطح پرکئے گئے سروے پر مبنی تھے، جس میں دیگر سوالوں کے علاوہ 50 سال سے زیادہ عمر کے 20000 بالغوں سے ان کے پالتو جانوروں کی حیثیت کے بارے میں پوچھا گیا تھا۔

محققین نے ان نتائج کو برسوں بعد استعمال کرتے ہوئے جائزہ لیا کہ ایسے افراد جنہوں نے پالتو جانوروں کے خانے پر ٹک کیا تھا چھ سالہ جانچ پڑتال کی مدت میں اپنے علمی اسکور میں دلچسپ فرق کو ظاہر کیا۔

اس کا اثر صرف 65 سال سے زیادہ عمر کے شرکاء میں ظاہر ہوا، جو عام طور پر اس وقت ہوتا ہے جب ڈیمنشیا کی علامات ظاہر ہونا شروع ہوتی ہیں۔

محققین کے مطابق اس عمر کے افراد جن کے پاس کوئی بھی جانورپانچ سال سے زیادہ عرصے تک موجود رہا تو ان کی قلیل مدتی اور طویل مدتی یادداشت بہت بہتر تھی بہ نسبت ان لوگوں لوگوں کے جن کے پاس کوئی بھی جانور نہیں تھا۔

تاہم محققین کا کہنا ہے کہ نتائج صرف ایک ایسوسی ایشن ہیں واضح ثبوت نہیں ہے۔

یہ بات درست ہے کہ پالتو جانور رکھنا آپ کی صحت کے لیے مفید ہے لیکن ایسا کیوں ہے اس کے بارے میں بہت سے نظریات موجود ہیں۔

مثال کے طور پراگر کسی کے پاس ایک کتا موجود ہے تو پالتو جانور اپنے مالکان کو بار بار اٹھنے اور زیادہ حرکت کرنے پر مجبورکرتا ہے اور روزانہ کی یہ نقل وحرکت دماغی صحت کے ساتھ طویل عمرسے گہرا تعلق رکھتی ہے۔

جانور گھریلو گردش میں نئے بیکٹیریا بھی لاتے ہیں، جو آپ کی آنتوں کی صحت کو بہتر بنا سکتے ہیں۔ جبکہ آنتوں کا دماغ کی صحت سے ایک ایسا تعلق ہے جس کے بارے میں سائنسدانوں کا کہنا ہے کہ یہ ہماری سوچ سے کہی زیادہ ہے۔

پالتو جانورآپ کی خوشی کا باعث بنتے ہیں یہ تنہائی کو دور کرکے دائمی تناؤ سے نجات دلاتے ہیں اور بڑھتی عمر میں یہ پہلے سے کہیں زیادہ اہم ہو سکتے ہیں اس عمر میں تنہا رہنا دماغ کو زیادہ متاثر کرتا ہے۔

ڈیمنشیا کے خطرے کے عام عوامل میں جسمانی سرگرمی کا نہ ہونا، تنہائی، قلبی بیماری، ڈپریشن یا اضطراب اور دائمی تناؤ شامل ہیں۔

مختصراً، پالتو جانور رکھنے سے یاداشت کی کمی کے مختلف عوامل سے تحفظ ملتا ہے۔

لوگ اپنے دن کو پالتو جانوروں کے حوالے سے تشکیل دیتے ہیں، اور جانوروں کی یہ دوستی زندگی کے ہر پہلو کو متاثر کر سکتی ہے۔ پالتو جانور آپ کو اندر اور باہر دونوں طرح سے جواں اور فٹ رکھ سکتے ہیں۔

یہ تحقیق جرنل آف ایجنگ اینڈ ہیلتھ میں شائع ہوئی ہے۔