پاکستان میں جوڑوں کے درد کے مریضوں کی تعداد میں دن بدن اضافہ ہوتا جارہا ہے۔

 اب سوال یہ ہے کہ ایسے کون سے افراد ہیں جن کو موسم سرما آتے ہی جوڑوں کا درد شروع ہو جاتا ہے؟ آج ہم آپ کو ان کے بارے میں بتائیں گے۔

موسم سرما نزلہ کھانسی جیسی بیماریوں کے ساتھ کچھ لوگوں کیلئے جوڑوں کے درد جیسے مسائل بھی لے آتا ہے۔

 اس تکلیف میں زیادہ تر عمر رسیدہ افراد مبتلا ہوتے ہیں اور وہ لوگ بھی جن کو  گٹھیا کی بیماری ہوتی ہے، ساتھ ہی کھیل کود میں سرگرم رہنے والے کھلاڑیوں سمیت جسمانی محنت کرنے والوں کو بھی یہ تکلیف ہوسکتی ہے۔

اب آپ سوچ رہے ہوں گے کہ اس درد سے چھٹکارا کیسے حاصل کیا جائے؟ تو آئیے ہم آپ کو کچھ طریقے بتاتے ہیں۔

ورزش

روزانہ ورزش سے جسم میں خون کی گردش کو بہتر بنانے میں مدد مل سکتی ہے، لیکن دھیان رہے کہ زیادہ ورزش نہیں کرنی کیوں کہ اس سے درد بڑھ بھی سکتا ہے تو لہٰذا ہلکی پھلکی ورزش کو معمول بنائیں۔

یہ بھی پڑھیں؛ جانئے تیز پات کس طرح موسم سرما میں آپ کوجوڑوں کے درد سے نجات دے سکتے ہیں

خود کو گرم رکھیں

موسم سرما کی سرد ہوائیں بھی جوڑوں کے درد کا باعث بنتی ہے لہٰذا سرد علاقوں میں رہنے والے لوگ گرم کپڑوں کے علاوہ گھر میں ہیٹر کا استعمال بھی کریں۔

اومیگا 3 سے بھرپور غذاؤں کا استعمال

اومیگا 3 سے بھرپور غذاؤں کا استعمال کریں کیوں کہ ان سے آپ جوڑوں کے درد سے نجات حاصل کر سکتے ہیں، ان غذاؤں میں مچھلی، اخروٹ، ایواکاڈو سمیت السی کے بیج شامل ہیں۔

پانی کا استعمال

جوڑوں کے درد سے نجات حاصل کرنے کیلئے سردیوں میں نیم گرم پانی کا استعمال کریں۔