دنیا بھرمیں لوگوں کی بڑی تعداد مختلف وجوہات کی بنا پردن بھر بیٹھ کر وقت گزارتی ہے جو صحت کے لیے انتہائی نقصان دہ ہے تاہم ایک تحقیق کے مطابق صرف 5 منٹ کی چہل قدمی ان نقصانات کے ازالے کے کافی ہیں۔

محققین طویل عرصے سے سارادن بیٹھے رہنے کے نقصان سے بچنے کے لیے مختلف طریقہ کار پر غور کر رہے ہیں کیونکہ زیادہ دیر تک بیٹھے رہنا سگریٹ پینے سے بھی زیادہ نقصان دہ ثابت ہوتا ہے،  تاہم حال ہی میں کی جانے والی ایک تحقیق کے مطابق ہر آدھے بعد صرف 5 منٹ کی چہل قدمی ان نقصانات سے محفوظ رکھ سکتی ہے۔

کولمبیا یونیورسٹی میں ایسوسی ایٹ پروفیسر آف ہیویورل میڈیسن کیتھ ڈیازاور ان کی ٹیم نے یہ جاننے کے لیے 11 صحت مند عمر رسیدہ  اور بڑی عمرکے افراد کو لیب میں 8 گھنٹے بیٹھنے کو کہا جو کہ ملازمت یا کسی بھی کام کے حوالے سے دنیا بھر میں رائج ایک میعاری وقت کی نمائندگی کرتے ہیں۔

محققین نے تمام شرکاء کو پانچ الگ الگ دنوں کے دوران ہر دن شرکاء کے بیٹھے رہنے اور چلنے پھرنے کے اوقات کو نوٹ کیا۔ محققین نے ان میں سے ایک دن شرکاء کو صرف باتھ روم استعمال کرنے کے لیے مختصر وقفوں کے ساتھ پورے 8 گھنٹے بیٹھنے کو کہا۔

دوسرے دن شرکاء کے مستقل بیٹھے رہنے کے عمل  کو توڑنے کے لیے متعدد مختلف حکمت عملیوں کا تجربہ کیا۔ مثال کے طور پر، ایک دن، شرکاء کو ہر آدھے گھنٹے میں 1 منٹ تک چلنے کو کہا، جبکہ دوسرے دن، انہیں ہر گھنٹے بعد  5 منٹ پیدل چلنے کا مشورہ دیا۔

محققین کا کہنا ہے کہ ان سب کا مقصد چہل قدمی کی وہ کم سے کم مدت تلاش کرنا تھی جو بیٹھنے کے مضر صحت اثرات کو دور کرنے میں معاون ثابت ہوسکے، اس کے لیے محققین نے تمام شرکاء میں  بیٹھے رہنے کی وجہ سے جسم میں بلڈ شوگر اور بلڈ پریشرمیں ہونے والی تبدیلیوں کی پیمائش کی جو کہ امرض قلب کے بنیادی عوامل ہیں۔

تاہم ہر آدھے گھنٹے بعد کی جانے والی 5 منٹ کی ہلکی چہل قدمی ہی وہ واحد حکمت عملی تھی جس نے پورے دن بیٹھنے کے مقابلے میں بلڈ شوگر کی سطح کو کافی حد تک کم کیا۔ خاص طور پر اس چہل قدمی نے کھانے کے بعد کی بلڈ شوگر میں تقریباً 60 فیصد تک کمی کی جو کسی حد تک ایک صحت مند سطح ہے۔

 ساتھ ہی اس حکمت عملی نے پورے دن بیٹھنے کے مقابلے میں بلڈ پریشر کو بھی چار سے پانچ پوائنٹس تک کم کیا۔ لیکن یہاں یہ بات قابل ذکر ہے کہ کم دورانئے کی چہل قدمی بھی بلڈ پریشر کو کم کرنے کی صلاحیت رکھتی ہے یہاں تک کہ ہر گھنٹے میں صرف 1 منٹ کی ہلکی چہل قدمی سے بھی بلڈ پریشر میں پانچ پوائنٹس کی کمی واقع ہوتی ہے۔

چہل قدمی سے نہ صرف جسمانی فوائد حاصل ہوتے ہیں بلکہ یہ دماغی صحت کے لیے بھی بے حد افادیت رکھتی ہے، اس طرح ہر آدھے گھنٹے بعد صرف 5 منٹ کی چہل قدمی دن بھر بیٹھنے کے مقابلے میں تھکاوٹ کے احساس کو بھی دور کرتی ہے اور مزاج کو بہتر بناکر توانائی بخشتی ہے۔

جو لوگ گھنٹوں بیٹھے رہتے ہیں ان میں ذیابیطس، دل کی بیماری، ڈیمنشیا اور کینسر کی کئی اقسام سمیت دائمی بیماریاں ان لوگوں کی نسبت  بہت زیادہ ہوتی ہیں جو دن بھر جسمانی سرگرمیوں میں مصروف رہتے ہیں۔

اس طرح کی غیر صحت طرز زندگی لوگوں کو جلد موت کے خطرے کو بڑھاتی ہے۔ تاہم دن بھر میں ہر آدھے گھنٹے کے بعد 5 منٹ کی چہل قدمی آپ ان مضر صحت اثرات سے محفوظ رکھ سکتی ہے۔