پاکستان میں چائے کی مقبولیت سے انکار ممکن نہیں اور یہ گرم مشروب دنیا کے بیشتر حصوں میں بھی پسند کیا جاتا ہے۔

لیکن کیا آپ الگ الگ طریقوں سے چائے بنانے کا طریقہ جانتے ہیں؟ اگر نہیں تو آئیے ہم آپکو بتاتے ہیں۔

کڑک چائے

یہ چائے عام طور پر ان لوگوں کو پسند ہوتی ہے جو کہ دماغی کام یا جسمانی کام زیادہ کرتے ہیں۔

دو کپ پانی لے کر ساس پین میں ڈالیں اور ایک دو الائچیاں اس میں کھول کر ڈال دیں اور اس کو چولہے پر رکھ کر ابلنے دیں۔

جب جوش آجائے تو چینی اور چائے کی پتی یا ٹی بیگ شامل کر دیں اور اچھی طرح دو منٹ تک پکا لیں اور پھر ڈھک کر چولہا بند کر دیں اور چند منٹ ایسے ہی رہنے دیں تاکہ چائے کی پتی اچھی طرح اس میں شامل ہو جائے پھر بہ ضرورت دودھ شامل کر کے ایک منٹ تک پکائيں اور مزیدار کڑک چائے سے لطف اٹھائيں۔

یہ بھی پڑھیں: چائے نہ ملنے پر کچھ افراد کو سردرد کیوں ہوتا ہے؟ وجہ جانیے

گڑ والی چائے

سردی کے موسم میں جسم کو گرم کرنے کے لیے گڑ والی چائے کا استعمال کیا جاتا ہے۔

اس چائے کی تیاری کے لیے دو کپ پانی کو ساس پین میں ڈال کر اس میں ایک درمیانی سائز کی گڑ کی ڈلی شامل کر دیں اور اس کے ساتھ ہی چائے کی پتی یا ٹی بیگ بھی ڈال دیں۔

اس کے بعد اس کو اس وقت تک پکائيں جب تک کہ گڑ اچھی طرح پگھل جائے۔

اس کے بعد اس میں پاؤڈر والا دودھ شامل کر دیں اور اس کو مزید دو منٹ پکائيں اور گرما گرم چائے چھان کر پیئيں۔

ادرک والی چائے

سردی کے موسم میں بارشوں میں یا پھر نزلہ زکام کی حالت میں ادرک والی چائے بہترین ثابت ہوتی ہے۔

یہ بھی پڑھیں: کیا آپ صبح چائے پینے کے حیرت انگیز فوائد جانتے ہیں؟

اس چائے کی تیاری کے لیے ادرک کے چھوٹے سے ٹکڑے کو باریک پیس لیں اور آدھا چائے کا چمچ ادرک دو کپ پانی کے ساتھ ابال لیں۔

اس کے بعد اس میں چائے کی پتی شامل کر کے جوش دیں اور چینی اور دودھ شامل کر کے کچھ دیر پکائيں اور تیز چائے کے ساتھ ادرک کا لطف اٹھائيں۔

گلاب چائے

خوش ذائقہ اور خوشبودار گلاب چائے خصوصی مواقعوں یا دعوتوں کے لیے بہترین ہوتی ہے اس چائے کی تیاری کے لیے ایک ساس پین میں دو کپ پانی لیں اور اس میں چائے کی پتی شامل کر کے اس کو ابال لیں۔

اس کے ساتھ ایک اور ساس پین لیں جس میں دو کپ دودھ ڈالیں اور ایک چمچ گلاب کی تازہ پتیوں شامل کریں اس کے بعد اس میں دو چمچ لال شربت کے ملا کر دھیمی آنچ پر دس منٹ تک پکائيں۔

اس کے بعد چائے کی پتی والا ساس پین بھی اس میں انڈیل لیں اور دھیمی آنچ پر پکنے دیں جوش کھانے پر کپ میں چھان کر نکال لیں اور پسے ہوئے بادام چائے کی سطح پر ڈال کر پیش کریں۔

کشمیری چائے

اس چائے کی تیاری کے لیے دو کپ پانی میں دو چمچ کشمیری چائے اور اچھی کوالٹی کی سبز چائے ایک چمچ شامل کر کے دھیمی آنچ دس سے پندرہ منٹ تک پکائيں۔

اس کے بعد اس میں چٹکی بھر کھانے کا سوڈا شامل کر کے مزيد پکائيں اس کے بعد اس میں ڈيڑھ کپ دودھ اور دو دانے سبز الائچی شامل کر کے اس وقت تک پکائيں جب تک کہ چائے کا رنگ خوبصورت گلابی ہو جائے۔

حسب ذائقہ چینی شامل کریں اور چھان کر کپ میں ڈال لیں اور اس کے اوپر پسے ہوئے بادام اور پستے ڈال کر پیش کریں۔