سرطان یا کینسر کا شمار دنیا میں سب سے زیادہ پائے جانے والے امراض میں ہوتا ہے۔

اگر آپ اس جان لیوا بیماری سے بچنا چاہتے ہیں تو “الٹرا پراسیس غذاؤں” کے زیادہ استعمال سے پرہیز کریں۔

جی ہاں، یہ بات برطانیہ میں ہونے والی ایک نئی طبی تحقیق میں سامنے آئی ہے۔

تحقیق کے مطابق الٹرا پراسیس غذاؤں کے زیادہ استعمال سے کینسر سے متاثر ہونے اور اس سے موت کا خطرہ بڑھتا ہے۔

الٹرا پراسیس غذاؤں میں ڈبل روٹی، فاسٹ فوڈز، مٹھائیاں، ٹافیاں، کیک، نمکین اشیا، بریک فاسٹ سیریلز، چکن اور فش نگٹس، انسٹنٹ نوڈلز، میٹھے مشروبات اور سوڈا وغیرہ شامل ہیں۔

اس تحقیق کے لئے ایک لاکھ 97 ہزار سے زیادہ افراد کو لیا گیا، تحقیق میں دریافت کیا گیا الٹرا پراسیس غذاؤں پر ہمارا جسم اس طرح ردِ عمل ظاہر نہیں کرتا جیسا قدرتی غذاؤں پر کرتا ہے۔

یہ بھی پڑھیں: کینسر سے بچنا اب نہایت آسان

تحقیق میں بتایا گیا کہ الٹرا پراسیس غذائیں پسند کرنے والے افراد سافٹ ڈرنکس کا استعمال بھی زیادہ کرتے ہیں جبکہ سبزیوں اور پھلوں کو زیادہ پسند نہیں کرتے جس سے بھی کینسر اور دیگر امراض کا خطرہ بڑھتا ہے۔

اس تحقیق میں شامل افراد کی غذائی عادات اور کینسر کی 34 مختلف اقسام کے درمیان تعلق کا جائزہ 10 سال تک لیا گیا۔

غذائی عادات کا موازنہ کینسر کی تشخیص اور اموات کے طبی ریکارڈز سے کیا گیا۔

تحقیق میں معلوم ہوا کہ الٹرا پراسیس غذاؤں کے استعمال میں ہر 10 فیصد اضافے سے کسی بھی قسم کے کینسر سے متاثر ہونے کا خطرہ 2 فیصد تک بڑھ جاتا ہے۔

یہ بھی پڑھیں: کون سی سبزیاں کینسر کو ہرانے میں مددگار ثابت ہو سکتی ہیں؟

تحقیق کے مطابق الٹرا پراسیس غذاؤں کے استعمال میں ہر 10 فیصد اضافے سے کسی بھی قسم سے کینسر سے موت کا خطرہ 6 فیصد تک بڑھ جاتا ہے۔

محققین کا کہنا ہے کہ تمام تر عناصر جیسے سماجی، معاشی، تمباکو نوشی، جسمانی سرگرمیوں اور دیگر کو مدِ نظر رکھنے کے بعد بھی یہ تعلق برقرار رہا۔

واضح رہے کہ اس تحقیق کے نتائج جرنل ای کلینیکل میڈیسین میں شائع ہوئے ہیں۔

یہ بھی پڑھیں: کینسر کے تیزی سے پھیلنے کی اہم وجہ دریافت