خشک میوہ جات میں شامل تمام ہی گریاں صحت سے بھرپور ہونے کے ساتھ نہایت مزیدار بھی ہوتی ہیں تاہم کاجو کا ذائقہ اور غذائیت سب سے منفرد ہے۔

کاجو کے بارے میں کہاجاتا ہے اس میں چکنائی کی مقدار زیادہ ہوتی ہے جو آپ کے وزن بڑھنے کا سبب بن سکتی ہے۔ تاہم اس گری دار پھل میں بہت سے غذائی اجزاء پائے جاتے ہیں جو کہ جسمانی و ذہنی صحت کو برقرار رکھنے اور اس میں بہتری لانے کے لیے بہت مفید ثابت ہوتے ہیں۔ ایک عام اندازے کے مطابق اٹھائیس گرام کاجو میں ایک سوستاون کیلوریز، پانچ گرام پروٹین، بارہ گرام فیٹ، اور ایک گرام فائبرموجود ہوتا ہے۔ اس کے علاوہ کاجو میں میگنیشیم، میگنیز، زنک، فاسفورس، آئرن، زنک، سیلینیم، تھایامین، وٹامن کے، اور وٹامن بی6 بھی پایا جاتا ہے۔

یہ صحت سے بھرپور میوہ کس طرح آپ کی مجموعی صحت کو بہتر بناتا ہے جانتے ہیں۔

دل کا محافظ

کاجو جسم میں برے کولیسٹرول جسے ایل ڈی ایل کہاجاتا ہے کوکم کرنے مددفراہم کرتا ہے جبکہ اچھے کولیسٹرول جسے ایچ ڈی ایل کہاجاتا ہے کو بڑھاتا ہے، ایچ ڈی ایل دل سے کولیسٹرول کو جذب کر کے جگر تک پہنچاتا ہے جہاں جگر اسے توڑ دیتا ہے۔

 خون سے متعلق امراض

کاجو کا باقائدگی کے ساتھ استعمال خون کی بیماریوں سے تحفظ فراہم کرتا ہے۔

بینائی کی حفاظت

کاجو میں ذی زینتھن نامی پگمنٹ پایا جاتا ہے جو براہ راست ریٹینا کے ذریعے جذب ہوکر اس پر ایک حفاظتی تہہ بناتا ہے جو اسے سورج کی مضر شعاعوں یو وی ریز سے تحفظ فراہم کرتی ہے۔

جلد کے لیے بہترین

کاجو سے حاصل کیا گیا تیل جلد کے لیے انتہائی بہترین تصور کیاجاتا ہے۔ یہ جلد کے کئی مسائل حل کرنے کی بھرپور صلاحیت رکھتا ہے۔

وزن میں کمی

کاجو میں اومیگا تھری فیٹی ایسڈ کی کثر مقدار پائی جاتی ہے جو میٹابولزم کو متحرک کرنے میں اہم کردار ادا کرتا ہے اس طرح جسم میں موجود اضافی چربی کو بطورتوانائی استعمال کرنے میں مدد ملتی ہے۔

غذائی فائبر کا مؤثر ذریعہ

کاجو غذائی فائبرکے حصول کا ایک بہترین ذریعہ ہے، یہ فائبر غذا کو بہتر طریقے سے ہضم کر کے آپ کے پیٹ کو دیر تک بھرا رہنے کا احساس دلاتا ہے جس سے آپ بے وقت کی بھوک سے بچے رہتے ہیں۔

صحت مند بال

کاجو کے تیل میں موجود کاپر جلد اور بالوں کو رنگت دینے والے مرکب میلانن کی پیداوار کو بڑھانے میں مددفراہم کرتا ہے۔ اس طرح جلد اور بالوں کی رنگت بہتر رہتی ہے ۔