بارسلونا انسٹی ٹیوٹ فار گلوبل ہیلتھ کے تحت کی جانے والی ایک تحقیق کے مطابق سائنسدانوں کا کہنا ہے کہ شہروں میں مزید درخت لگاکر ہزاروں جانیں بچائی جاسکتی ہے جنہیں گرم موسم کی وجہ صحت کے خطرات لاحق ہیں۔

درخت انسانی زندگی کی بقا کے ضامن ہیں ان کی موجودگی نہ صرف ہوا کے معیار کو بہتر بناتی ہے بلکہ گرمی کی شدت کو کم کرکے آپ کو صحت مند رکھتی ہے۔

یہی وجہ ہے دنیا بھر کے سائنسدان شہروں میں شجرکاری کی اہمیت پر زور دے رہیں ہیں۔

بارسلونا انسٹی ٹیوٹ فار گلوبل ہیلتھ  کے ایک محقق اور اس تحقیق کے مرکزی مصنف تمارا ایونگ مین نے کہا کہ یہ مطالعہ شہروں میں زیادہ درجہ حرارت کی وجہ سے قبل از وقت اموات کی تعداد کو پیش کرنے والا پہلا مطالعہ ہے جسے درختوں کی تعداد میں اضافے سے روکا جا سکتا ہے۔

محققین کا کہنا ہے کہ موسم گرما کے درجہ حرارت کو کم کرنے کے لیے شہری علاقوں میں زیادہ درخت لگانے سے گرم موسم اور گرمی کی لہروں سے براہ راست منسلک اموات میں ایک تہائی کمی واقع ہوسکتی ہے۔

اس تحقیق میں یورپ کے 93 شہروں کے ڈیٹا کا تجزیہ کیا گیا تھا۔

ان کا کہنا تھا کہ شہر میں درختوں کو 30 فیصد تک بڑھانا مقامی طور پر 0.4 ڈگری سینٹی گریڈ کم کر دے گا۔

نتائج کے مطابق 2015 کے دوران 93 یورپی شہروں میں زیادہ درجہ حرارت کی وجہ سے ہونے والی 6700 قبل از وقت اموات میں سے ایک تہائی کو روکا جا سکتا تھا۔

انہوں نے مزید کہا کہ  شہری ماحول میں زیادہ درجہ حرارت صحت کے کئی مسائل سے منسلک ہے۔ یہ اضافی گرمی بنیادی طور پر پودوں کی کمی، ائر کنڈیشنگ سسٹم سے نکلنے کے ساتھ ساتھ گہرے رنگ کے تعمیراتی مواد کی وجہ سے ہوتی ہے جو گرمی کو جذب کرلیتے ہیں۔ جبکہ موسمیاتی تبدیلی نے پہلے ہی اس مسئلے کو بڑھا دیا ہے۔ یہی وجہ ہے کہ پچھلے سال یورپ نے ریکارڈ گرمی دیکھی۔

شہروں کے ایسے علاقوں میں درخت لگانا نہایت ضرروی ہے جہاں گرمی زیادہ محسوس ہو تاکہ وہاں کے رہنے والوں کی صحت کو بہتر بنایا جاسکے۔

ابتدائی مطالعات سے یہ بات سامنے آئی ہے کہ سر سبز مقامات سے صحت کے اضافی فوائد حاصل ہوتے ہیں جیسے امراض قلب، ڈیمنشیا، اور ذہنی پسماندگی کو کم کرنا، نیز بچوں اور بوڑھوں کے علمی استعداد کو بہتر بنانا ۔