پیٹ پھولنا کوئی بیماری نہیں ہے اور نا اس کے لئے کوئی عمر مقرر ہوتی ہے۔

اکثر لوگوں کو پیٹ پھولنے کی شکایت ہوجاتی ہے چاہے وہ بڑا ہو یا پھر چھوٹا ہو۔

ایسا تب ہوتا ہے جب انسان بیٹھے رہنے کا عادی ہوجاتا ہے اور کچھ بھی کھانے پینے کے بعد بھی اپنی جگہ سے ہلنا پسند نہیں کرتا ہے۔

تو آج ہم آپ کو پیٹ کی پھولنے کی وجوہات بھی بتائیں گے اور اس سے نجات حاصل کرنے کے مختلف طریقے کار سے بھی آگاہ کریں گے۔

بہت زیادہ فائبر کھانے سے گریز کریں

فائبر کاربوہائیڈریٹ کی ایک ایسی قسم ہے جو نباتاتی غذاؤں میں پائی جاتی ہے اور ہمارا جسم اس غذائی جز کو ہضم نہیں کر پاتا۔

فائبر ہمارے جسمانی افعال جیسے بلڈ شوگر کو ریگولیٹ کرنے اور دیگر کے لیے بہت اہم ہوتا ہے۔

مگر فائبر سے بھرپور غذاؤں کو کھانے کے بعد معدے میں گیس کی مقدار بڑھ جاتی ہے۔

پھلیوں، دالوں، سیب اور مالٹے جیسے پھلوں، اناج، جو، گوبھی اور ایسی ہی دیگر سبزیوں میں فائبر کی مقدار زیادہ ہوتی ہے۔

کسی مخصوص غذا سے الرجی

پیٹ پھولنا اکثر کسی غذا سے الرجی کی علامت بھی ہوتا ہے۔

اس الرجی کے نتیجے میں جسم کے اندر گیس بہت زیادہ بننے لگتی ہے جو معدے اور آنتوں کی نالی میں پھنس جاتی ہے۔

یہ بھی پڑھیں: روزانہ دہی استعمال کرنے والے ہوجائیں ہوشیار؛ نئی تحقیق آگئی

ایسا اکثر دودھ یا گندم پر مبنی غذاؤں کے کھانے سے ہوتا ہے، ایسا کوئی قابل اعتبار طبی ٹیسٹ تو نہیں جس سے غذائی الرجی کی تشخیص ہوسکے بلکہ کوئی فرد خود یہ اندازہ لگا سکتا ہے کہ کن غذاؤں کو کھانے سے پیٹ پھولنے کا مسئلہ ہر بار ہوتا ہے۔

زیادہ چکنائی والی غذائیں بھی نقصان دہ

چکنائی کسی بھی غذا کا اہم حصہ ہے اور جسمانی توانائی کا ایک اہم ذریعہ بھی۔

ہمارا جسم چکنائی یا چربی کو سست روی سے ہضم کرتا ہے اور اسی کے باعث کچھ افراد کو زیادہ چکنائی والی غذائیں کھانے سے پیٹ پھولنے کے مسئلے کا سامنا ہوتا ہے۔

آرام سے کھانا پینا عادت بنائیں

مشروبات یا کھانے کو بہت تیزی سے جسم کا حصہ بنانے کے نتیجے میں لوگ بہت زیادہ مقدار میں ہوا بھی نگل لیتے ہیں جس کے نتیجے میں گیس کی مقدار بڑھ جاتی ہے اور پیٹ پھول جاتا ہے۔

یہ بھی پڑھیں: خراب ہاضمے میں کیا کھائیں اور کن غذاؤں سے پرہیز کریں؟ ماہرین نے آگاہ کردیا

اس کے مقابلے میں آرام سے کھانا کھانے یا مشروبات یا پانی پینے سے اس مسئلے سے بچنا آسان ہو جاتا ہے۔

کاربونیٹڈ مشروبات سے بھی گریز کریں

کاربونیٹڈ مشروبات جیسے سافٹ ڈرنکس، انرجی ڈرنکس اور دیگر میں کاربن ڈائی آکسائیڈ موجود ہوتی ہے جو معدے میں اکٹھی ہو جاتی ہے جس سے پیٹ پھول جاتا ہے۔

ان مشروبات کا بہترین متبادل پانی ہے جس سے پیٹ پھولنے کا خطرہ کم ہوتا ہے۔

ادرک سے مدد لیں

ادرک نظام ہاضمہ کے لیے بہترین ہے جس کے استعمال سے معدے میں اضافی گیس کی مقدار کم ہوتی ہے اور پیٹ پھولنے کے مسئلے سے بچنا آسان ہو جاتا ہے۔

چیونگم کھانے سے بچیں

چیونگم چبانے کے دوران لوگ بہت زیادہ مقدار میں ہوا کو نگل لیتے ہیں اور یہ ہوا کچھ افراد میں پیٹ پھولنے کا باعث بنتی ہے۔

کھانے کے بعد ہلکی پھلکی جسمانی سرگرمیاں

کھانے کے بعد ہلکی پھلکی جسمانی سرگرمیاں جیسے چہل قدمی کرنے سے پیٹ پھولنے کے مسئلے سے بچنے میں مدد ملتی ہے۔

یہ بھی پڑھیں: کالے نمک کے ایسے فوائد جن سے اکثریت ناواقف ہے، جانیے

کھانے کے دوران بات نہ کریں

کھانے کے دوران بات کرنے سے ہوا نگلنے کی مقدار بڑھ جاتی ہے۔

یہ ہوا معدے میں اکھٹی ہو جاتی ہے جس سے پیٹ پھول جاتا ہے، تو خاموشی سے کھانا عادت بنانا بہتر ہے۔

زیادہ نمک کھانے سے گریز کریں

ہمارے جسم کو نمک کی ضرورت ہوتی ہے مگر بیشتر افراد ضرورت سے زیادہ مقدار کو جسم کا حصہ بنالیتے ہیں۔

یہ بھی پڑھیں: سونف کی چائے کے ان گنت فوائد، جان کے آپ حیران ہوجائیں گے

اس کے نتیجے میں نمک جسم کے اندر پانی جمع کرنے لگتا ہے جو وقت کے ساتھ مختلف بیماریوں جیسے ہائی بلڈ پریشر کا باعث بن جاتا ہے مگر مختصر المدت بنیادوں پر پیٹ پھولنے کی شکایت کا سامنا ہوتا ہے۔