دنیا میں گندم کے بعد جو اناج سب سے زیادہ کھایا جاتا ہے وہ چاول ہے۔ چاول نہ صرف ایک سستا اور قابل رسائی اناج ہے بلکہ کسی قدر صحت بخش بھی ہے۔ حیرت کی بات یہ ہے چاول نہ صرف پانی میں اگایا جاتا ہے بلکہ اسے بہت ہی آسانی سے پانی ہی میں پکایا جاتا ہے۔

چاول دنیا کی نصف سے زیادہ آبادی کے لیے ایک اہم غذا ہے، اور اسے پوری دنیا کے لوگ باقاعدگی سے کھاتے ہیں۔ اگرچہ بھورے چاول کو سفید چاولوں سے زیادہ صحت بخش سمجھا جاتا ہے کیونکہ یہ وٹامنز اور منرلز سے بھرپور ہوتے ہیں، پھر بھی لوگ سفید چاولوں کو غذا میں شامل رکھنے کو ترجیح دیتے ہیں۔

سفید چاول بھی میگنیشیم، فاسفورس، مینگنیز اور دیگر معدنیات حاصل کرنے کا ایک مؤثر ذریعہ ہیں، تاہم اسے روز استعمال کرنا جسم کے لیے مضر ثابت ہوسکتا ہے یہاں پر ان  ہی مضر صحت اثرات کے بارے بتایا جارہا ہے۔

قبض

بہت سے مطالعات سے یہ بات سامنے آئی ہے کہ فائبر کی کثیر مقدار قبض کے خطرے کوکم کرنے میں مددفراہم کرتی ہے جبکہ ایک تحقیق کے مطابق فائبر کا ہر اضافی گرام قبض کے امکانات کو 1.8 فیصد کم کرتا ہے۔ سفید چاول جیسے پراسیس شدہ اناج میں فائبر کی مقدار کم ہوتی ہے، اسی لیے جن لوگوں کو قبض کا سامنا ہے، ان کے لیے بہتر ہے کہ وہ سفید چاول کا استعمال کم کریں۔

بلڈ شوگر میں اضافہ

سفید چاول میں گلیسیمک انڈیکس زیادہ ہوتا ہے اور ایک تحقیق کے مطابق اسے مستقل طور پر کھانے سے ٹائپ ٹو ذیابیطس کا خطرہ بڑھ سکتا ہے۔ تاہم، چاول ان کھانوں میں سے ایک ہے جسے زیادہ تر دسترخوان کی زینت بنایاجاتا ہے۔ اس لیے متبادل کے طور پر، سفید کے بجائے ہول گرین چاول کا استعمال کرنا زیادہ بہتر ہے۔ اگرچہ اس میں کاربوہائیڈریٹ کی مقدار زیادہ ہوتی ہے، اس کے اینٹی آکسیڈنٹس، فائبر، معدنیات اور وٹامنز بلڈ شوگر کو کنٹرول کرنے میں مددگار ثابت ہوسکتے ہیں۔

پیٹ کی چربی میں اضافہ

سفید چاول ایک پراسیس شدہ غذا ہے اور اسے روز غذا میں شامل رکھنے سے وزن کم کرنے میں مشکل پیش آسکتی ہے۔ اس کی بنیادی وجہ سفید چاول میں فائبرکی مقدار کا کم ہونا ہے۔ فائبر کم ہونے کی بناپر غذا فوری ہضم ہوکربھوک کو جگا دیتی ہے۔ لہذا، اگر آپ چاول کے شوقین ہیں، تو بہتر ہے کہ سیاہ یا بھورے چاول کھائیں، جن میں فائبر کی مقدار زیادہ ہوتی ہے اور یہ آپ کے پیٹ کی چربی کو کم کرنے میں مدد دے سکتے ہیں۔

کولیسٹرول میں اضافہ

اگرچہ چاول میں کولیسٹرول نہیں پایا جاتا، پھر بھی یہ ٹرائگلیسرائڈز یا کولیسٹرول کی سطح میں اضافہ کا سبب بن سکتا ہے۔ زیادہ مقدار میں چاول کھانے سے خون میں شوگر کی سطح بلند ہونے لگتی ہے جو ٹرائگلیسرائیڈز میں اضافے کا باعث بنتی ہے، جس سے کولیسٹرول کی سطح بڑھ جاتی ہے۔