سرطان یا کینسر کا شمار دنیا میں سب سے زیادہ پائے جانے والے امراض میں ہوتا ہے مگر اب اس جان لیوا بیماری سے بچنا نہایت آسان ہوگیا ہے۔

امریکا کے Rutgers کینسر انسٹیٹیوٹ کے ماہرین کی جانب سے کینسر سے بچنے کے آسان طریقے بتائے گئے ہیں۔

صحت بخش غذا، جسمانی سرگرمیاں اور الکحل سے گریز

ماہرین کے مطابق صحت کے لیے بہترین غذا، جسمانی سرگرمیوں کو معمول بنانے اور جسمانی وزن کو مستحکم رکھنے کے متعدد فوائد ہیں۔

ان تینوں عناصر سے کینسر کی مختلف اقسام کا خطرہ بھی کم ہوتا ہے جبکہ مجموعی صحت اور معیار زندگی بہتر ہوتا ہے۔

ماہرین نے بتایا کہ اناج، سبزیوں، پھلوں اور دالوں یا پھلیوں کے زیادہ استعمال جبکہ چینی، سرخ گوشت، فاسٹ فوڈ اور دیگر پراسیس غذاؤں کے کم استعمال کو یقینی بنایا جانا چاہیے۔

یہ بھی پڑھیں: کون سی سبزیاں کینسر کو ہرانے میں مددگار ثابت ہو سکتی ہیں؟

اسی طرح جسمانی وزن کو مستحکم رکھنے کے لیے ورزش کو معمولات زندگی کا حصہ بنانا چاہیے۔

انہوں نے بتایا کہ الکحل کے استعمال سے کینسر کی متعدد اقسام کا خطرہ بڑھتا ہے تو اس سے گریز کرنا چاہیے۔

تمباکو نوشی سے بچیں

تمباکو نوشی سے پھیپھڑوں، منہ، حلق، خون، مثانے، غذانی نالی، معدے اور گردوں کے کینسر کا خطرہ بڑھتا ہے۔

درحقیقت ماہرین کے مطابق کینسر کے 25 فیصد کیسز کے پیچھے تمباکو نوشی کی عادت چھپی ہوتی ہے۔

انہوں نے کہا کہ تمباکو نوشی سے گریز کرکے کینسر سے متاثر ہونے کا خطرہ کم کیا جاسکتا ہے۔

جلد کو سورج کی الٹرا وائلٹ شعاعوں سے تحفظ فراہم کریں

سورج کی الٹرا وائلٹ شعاعوں سے جلد کے کینسر کا خطرہ بڑھتا ہے۔

یہ بھی پڑھیں: کینسر کے تیزی سے پھیلنے کی اہم وجہ دریافت

ماہرین نے اس حوالے سے مشورہ دیا ہے کہ دوپہر کے وقت سورج کی روشنی میں کم از کم گھومنے کی کوشش کریں۔

اسی طرح چار دیواری سے باہر مکمل لباس پہن کر نکلیں جبکہ سن اسکرین کا استعمال کریں۔

ماہرین نے تسلیم کیا کہ کینسر کے تمام کیسز یا اموات کی روک تھام ممکن نہیں مگر تمباکو نوشی اور الکحل سے گریز، صحت مند جسمانی وزن کو برقرار رکھنا، سورج کی روشنی میں بہت زیادہ گھومنے سے بچنا اور متوازن غذا سے اس موذی مرض کے خطرے کو کم کیا جاسکتا ہے۔

یہ بھی پڑھیں: کیا جسمانی حیاتیاتی گھڑی میں بگاڑ پھیپھڑوں کے کینسر کا باعث بن سکتا ہے؟