پارکنسنز ایک اعصابی بیماری ہے جس میں دماغ میں موجود کچھ خلیات کام کرنا چھوڑ دیتے ہیں جس کی وجہ جسم اپنا توازن کھونے لگتا ہے اس کی کئی وجوہات ہیں تاہم ایک تحقیق کے مطابق ڈرائی کلیننگ میں استعمال ہونے والے کیمیکلز اس مرض کا سبب بن سکتے ہیں۔

محققین کے مطابق ایک عام اور وسیع پیمانے پر استعمال ہونے والا کیمیکل ٹرائکلوریتھیلین جسے ٹی سی ای کہا جاتا ہے پارکنسنز کا مرض بڑھانے سے منسلک ہے۔

یہ بھی پڑھیں: اسٹرابیری پارکنسن کے مریضوں کی عمر میں اضافہ کرتی ہے، تحقیق

واضح رہے کہ پارکنسنزدنیا کی سب سے تیزی سے بڑھتی ہوئی دماغی حالت ہے۔ دنیا بھرمیں تقریباً ایک کروڑ سے زائد افراد اس کا شکار ہیں اس بیماری میں جسم کی حرکات متاثر ہونے لگتی ہیں۔ اس کی ابتدا اکثر ہاتھوں میں رعشہ یعنی لرزش اور مختلف عضلات و پٹھوں کے اکڑنے سے ہوتی ہے اوروقت گزرنے کے ساتھ جسم آہستہ آہستہ اپنا توازن کھونے لگتا ہے، چلنا پھرنا یہاں تک کہ بات کرنا بھی دشوار ہو جاتا ہے۔

اس بیماری میں دماغ کے وہ سیل جو ڈوپامین کے خراج کا سبب بنتے ہیں شدید متاثر ہوتے ہیں کیونکہ ڈوپامین انسانی جسم کی حرکات کوتوازن میں رکھنے کے لیے کلیدی کردارادا کرتا ہے۔

یہ بیماری تقریباً 50 سال سے زائد عمر کے افراد میں ظاہر ہوتی ہے۔ تاہم اس سے قبل بھی اس مرض کے ہونے کے کچھ امکانات ہیں مگران کا تناسب بہت کم ہے۔

پچھلے 100 سالوں سے، ٹرائکلوریتھیلین ٹی سی ای  کا استعمال کافی کو ڈی کیفینیٹ کرنے، دھات کو کم کرنے اور خصوصاً کپڑوں کے ڈرائی کلیننگ کے لیے استعمال کیا جاتا ہے۔

یہ کیمیکل اسقاط حمل اور پیدائشی دل کی بیماری کا سب بننے کے ساتھ  پارکنسنز کی بیماری کے خطرے کو 500 فیصد بڑھانے سے منسلک ہے۔

جرنل آف پارکنسنز ڈیزیز کے ایک مفروضے میں یونیورسٹی آف روچیسٹر میڈیکل سینٹر کے نیورولوجسٹ رے ڈورسی، روتھ شنائیڈر، اور کارل کیبرٹز شامل ہیں یہ محققین قیاس کرتے ہیں کہ ٹٰی سی ای پارکنسنز کی ایک پوشیدہ وجہ ہو سکتی ہے۔ کیونکہ اس کیمیکل کا وسیع پیمانے پر استعمال اس مرض کو جنم دے سکتاہے۔

چوہوں پر کی جانے والی ایک تحقیق کے مطابق یہ کیمیکل آسانی سے دماغ اور جسم کے بافتوں میں داخل ہو جاتا ہے اور زیادہ مقدار میں خلیوں کے توانائی پیدا کرنے والے حصوں کو نقصان پہنچاتا ہے جسے مائٹوکونڈریا کہا جاتا ہے۔ جانوروں کے مطالعے میں، ٹی سی ای ڈوپامائن پیدا کرنے والے عصبی خلیات کے نقصان کا سبب بنتا ہے، جو انسانوں میں پارکنسنز کی بیماری کی ایک بنیادی وجہ ہے۔

یہی وجہ ہے کہ محققین نے اس کیمیکل کے استعمال پر پابندی کا مطالبہ کیا ہے تاکہ اس کیمیکل سے ہونے والے امراض سے بچا جا سکے۔