دنیا بھر میں آج خوشی کا عالمی دن منایا جارہا ہے اس دن کو منانے کا مقصد عالمی سطح پر لوگوں کی زندگیوں میں خوشی کی اہمیت کو تسلیم کرنا، اس کی ترغیب دینا اور صحت کے حوالے اس کی افادیت سے آگاہ کرنا ہے۔

اقوام متحدہ کی جنرل اسمبلی نے 12 جولائی 2012 کو اپنی ایک قرارداد کے مطابق 20 مارچ کو خوشی کا عالمی دن منانے کا اعلان کیا۔

اس دن کو منانے کی اصل وجہ دنیا بھر کے انسانوں کی زندگیوں میں خوشی اور فلاح و بہبود کو عالمی اہداف اور خواہشات کے طور پر تسلیم کرنا، عوامی پالیسی کے مقاصد میں ان کی پہچان اور اہمیت کو اجاگر کرنا۔ اقتصادی ترقی کے لیے ایک زیادہ جامع، منصفانہ اور متوازن نقطہ نظر کی ضرورت کو بھی تسلیم کرنا جو پائیدار ترقی، غربت کے خاتمے، خوشی اور تمام لوگوں کی بھلائی کو فروغ دیتا ہے۔

واضح رہے کہ یہ قرارداد بھوٹان کی طرف سے شروع کی گئی تھی، بھوٹان ایک ایسا ملک ہے جس نے 1970 کی دہائی کے اوائل سے قومی آمدنی پر قومی خوشی کی اہمیت کو تسلیم کیا۔ اس کے بعد اقوام متحدہ نے اسے عالمی طور پر منانے کا اعلان کیا۔

دنیا میں اس وقت بہت سے مسائل ہیں، جو کچھ ہو رہا ہے اسے تبدیل نہیں کیا جاسکتا لیکن خود خوش رہ کر اپنی ذات سے دوسروں کی زندگیوں میں ضرور خوشیوں کو پیدا کیا جاسکتا ہے۔

زندگی مشکلات اور آسانیوں کا مجموعہ ہے۔ عمومی طور پر آسانیوں کے وقت خوشی کا احساس ہوتا ہے جب کہ مشکلات کے وقت آپ بے چینی، ڈپریشن، اور اداسی محسوس کرتے ہیں۔ زندگی میں آسانیوں سے خوش رہنا تو سبھی جانتے ہیں مگر اصل ہنر یہ ہے کہ مشکلات میں بھی خوش رہنے کا طریقہ ڈھونڈا جائے۔

جب بھی کوئی ایسا کام کیا جائے جو ذہنی سکون کا باعث بنے تو دماغ میں ڈوپا مائن کا اخراج ہونے لگتا ہے یہ ایک ایسا ہارمون ہے جو خوشی کو بڑھاتا ہے۔

ایک عام فرد زندگی میں خوشیوں کو کیسے حاصل کر سکتا ہے اس کے لیے ماہرین کچھ عادات کو اپنانے کا مشورہ دیتے ہیں۔

متوازن غذا

اس کے لیے سب سے پہلے متوازن غذا کا استعمال ہے یہ آپ کی مجموعی صحت کو بہتر بنانے میں اہم کردار ادا کرتی ہے ایک متوازن غذا پھلوں، سبزیوں، دالوں، اور ڈیری مصنوعات پر مشتمل ہوتی ہے۔

ایک طبی تحقیق کے مطابق متوازن غذا تھکاوٹ کو دور کر کے جسم کوتوانائی فراہم کرتی ہے جبکہ   تھکاوٹ یا کمزوری اداسی اور مایوسی کا احساس جگاتی ہے یہی وجہ ہے کہ خوش رہنے کے لیے جسم کو توانائی فراہم کرنا انتہائی ضروری ہوتا ہے۔

مسکراہٹ

خوشی کا سب سے خوبصورت اظہار مسکراہٹ ہے جب کہ مسکراہٹ سے آپ کی خوشی میں اضافہ ہوتا ہے۔ جب آپ  مسکراتے ہیں تو دماغ میں ایسے کیمیکلز کا خراج ہوتا ہے جو خوشی کی کیفیت میں مزید اضافے کا سبب بنتا ہے۔

ورزش

ورزش کی افادیت سے کون واقف نہیں۔ یہ نہ صرف آپ کی مجموعی صحت کو بہتر بنانے میں مدد فراہم کرتی ہے بلکہ باقاعدگی کے ساتھ ورزش سے داغ میں ایسے کیمیکلز کی مقدار میں اضافہ ہوتا ہے جو خوشی میں اضافے کا سبب بنتا ہے۔

مراقبہ

مراقبہ کو ذہن سے تمام خیالات سے چھٹکارا پانے اور ارتکاز بڑھانے کے لیے بہترین تصور کیا جاتا ہے اس سے دماغ پریشان کن خیالات اور سوچوں سے پاک ہوجاتا ہے۔ جو خوشی کی راہ میں رکاوٹ کا سبب بنتے ہیں۔

پرسکون نیند

نیند کا معیار بہتر بنانے سے نہ صرف خوشی کے احساس میں اضافہ ہوتا ہے بلکہ یہ آپ کی مجموعی صحت کو بہتر بنانے میں اہم کردار ادا کرتی ہے۔

ان طریقوں پ عمل کر کے آپ خوشی کے احساس کو بڑھا سکتے ہیں۔