آج ہم آپکو بتائیں گے کہ روزانہ ایک کپ کافی پینے سے جسم پر کیا اثرات مرتب ہوتے ہیں۔

ایک حالیہ تحقیق کے مطابق روزانہ ایک کپ کافی پینے سے لوگ جسمانی طور پر زیادہ متحرک ہو جاتے ہیں اور وہ دن بھر میں ایک ہزار زیادہ قدم چلتے ہیں۔

جی ہاں، جسمانی سرگرمیوں میں اضافے سے صحت پر بھی مثبت اثرات مرتب ہوتے ہیں۔

تحقیق میں یہ واضح کیا گیا کہ دن بھر میں صرف ایک کپ کافی پینے سے لوگوں کی رات کی نیند کے دورانیے میں 36 منٹ کی کمی آتی ہے یعنی کافی کی مقدار بڑھنے سے نیند کا دورانیہ بھی کم ہو جاتا ہے۔

تحقیق کے مطابق کافی پینے سے دل کی دھڑکن بے ترتیب نہیں ہوتی اور اس حوالے سے فکرمند ہونے کی ضرورت نہیں۔

محققین نے کہا کہ حقیقت تو یہ ہے کہ کافی کا استعمال عموماً محفوظ ہوتا ہے مگر لوگوں کو اس کے جسمانی اثرات سے آگاہ ہونا چاہیے۔

اس تحقیق میں 100 صحت مند افراد کو شامل کیا گیا اور 14 دن تک ان کے دل کی دھڑکن اور صحت کے دیگر پہلوؤں کی جانچ پڑتال کی گئی۔

ہر فرد کے لیے کافی کی مخصوص مقدار طے کی گئی تھی، 2 دن انہیں کافی پینے کی اجازت ہوتی جبکہ اس کے بعد 2 دن تک اس سے دور رہنا پڑتا۔

نتائج سے معلوم ہوا کہ کافی پینے سے نیند پر واضح طور پر منفی اثرات مرتب ہوتے ہیں۔

البتہ اس گرم مشروب کو پینے سے جسمانی کارکردگی میں نمایاں اضافہ ہوتا ہے اور لوگ زیادہ چلنے لگتے ہیں۔

محققین کے مطابق یہ واضح نہیں کافی پینے سے لوگ زیادہ کیوں چلنے لگتے ہیں، شاید اس مشروب سے جسمانی توانائی میں اضافہ ہو جاتا ہے، مگر اس حوالے سے مزید تحقیق کی ضرورت ہے۔