آج ہم آپ کو رمضان المبارک میں خربوزہ کھانے کے ایسے فوائد بتائیں گے جنہیں جان کر آپ حیران رہ جائیں گے۔

 حال ہی میں ماہر غذائیت حنا انیس نے ایک نجی ٹی وی چینل کے شو میں شرکت کی جہاں انہوں نے ماہ رمضان میں خربوزے کی افادیت سے متعلق کہا کہ ’ خربوزے کو بطور سلاد استعمال کرنے سے آپ کو افطار میں مکمل غذا مل جائے گی جس سے آپ کے معدے پر خوشگوار اثرات پڑیں گے ‘۔

انہوں نے کہا کہ ’ جتنے بھی پھل ہیں وہ کھانے سے پہلے کھانے چاہئیں کیونکہ پھلوں کو ہضم ہونے میں دو سے تین گھنٹے لگتے ہیں، کیونکہ ہم کھانے میں پروٹین لے رہے ہوتے ہیں، کاربوہائیڈریٹ استعمال کرتے ہیں جنہیں ہضم ہونے میں چار سے پانچ گھنٹے لگتے ہیں ‘۔

  حنا انیس نے کہا کہ ’ پھلوں کو کھانے سے پہلے استعمال کرنے چاہیے ایسا نہ کرنے سے معدے میں موجود تہہ کو نقصان پہنچے گا اور ہمارے معدے میں موجود غذا سڑجائے گی ‘۔

ماہر غذائیت نے کہا کہ ’ خربوزہ 85 فیصد پانی پر مشتمل ہوتا ہے اس کے علاوہ اس میں فائبر، پوٹاشیم، کیلشیم، وٹامن سی وافر مقدار میں پایاجاتا ہے ‘۔

انہوں نے کہا کہ خربوزے میں گلاسیمک لوڈ کم پایا جاتا ہے، گلاسیمک لوڈ کا مطلب ہے وہ پھل جس میں وافر مقدار میں فائبر پایاجاتا ہو یہ انسانی جسم میں گلوکوز لیول کو بڑھنے نہیں دیتا، یہی وجہ ہے کہ شوگر کے مریض خربوزے کو استعمال کرسکتے ہیں ‘۔

حنا انیس نے کہا کہ ’ اگر خربوزہ پھیکا نکل آئے تو اس پر چینی ڈالنا انتہائی غلط ہے، خربوزہ پھیکا نکلنے پر اسے پودینے کے ساتھ ملاکر جوس بنالیا جائے جو ایک جوس کی شکل اختیار کرلے گا اس میں لیموں نچوڑ کر پینے سے معدے کو راحت ملے گی ‘۔