پُرسکون نیند جسمانی اور ذہنی صحت کے لیے بے حد ضروری ہے، بے آرام نیند نہ صرف ہمارے مزاج پر منفی اثر ڈالتی ہے بلکہ جسمانی صحت کو بھی نقصان پہنچاتی ہے۔

لیکن کیا آپ صرف ایک رات نہ سونے کا نقصان جانتے ہیں؟ اگر نہیں تو آئیے ہم آپکو بتاتے ہیں۔

ایک حالیہ طبی تحقیق کے مطابق ایک رات جاگ کر گزارنے سے دماغ کئی سال بوڑھا نظر آنے لگتا ہے۔

جی ہاں، اس تحقیق میں مشین لرننگ ٹیکنالوجی کو استعمال کر کے نیند کی کمی کے شکار افراد کی دماغی عمر کا تخمینہ لگایا گیا۔

یہ بھی پڑھیں: اکثر لوگ نیند میں باتیں کیوں کرتے ہیں؟ وجوہات جانیے

نتائج سے پتہ چلا کہ ایک رات کی خراب نیند سے بھی دماغ میں ایسی تبدیلیاں آتی ہیں جو دماغی عمر میں ایک سے 2 سال کی عمر میں اضافے کا عندیہ دیتی ہیں۔

اس تحقیق میں 134 افراد کو شامل کر کے ان کے 4 گروپس بنائے۔

ایک گروپ ایسے افراد کا تھا جو ایک رات مکمل طور پر نیند سے محروم رہے، دوسرا گروپ 3 گھنٹے کم سونے والے افراد کا تھا، تیسرا نیند کی دائمی کمی (ہر رات 5 گھنٹے سونے کے عادی) کے شکار افراد کا تھا جبکہ چوتھا ہر رات 8 گھنٹے تک سونے والوں کا تھا۔

تمام افراد کے 5 راتوں تک ایم آر آئی اسکین کیے گئے تاکہ نیند کی کمی سے پہلے اور بعد کے اثرات کا موازنہ کیا جاسکے۔

یہ بھی پڑھیں: کیا کمرے کا درجہ حرارت آپ کی نیند پر اثر انداز ہوتا ہے؟

نتائج سے معلوم ہوا کہ ایک رات مکمل طور پر نیند سے محروم رہنے والے افراد کی دماغی عمر میں ایک سے 2 سال کا اضافہ ہوگیا۔

البتہ جزوی اور دائمی نیند کی کمی کے شکار گروپس میں شامل افراد کی دماغی عمر میں 8 گھنٹے تک سونے والے افراد کے مقابلے میں کوئی خاص فرق نظر نہیں آیا۔

محققین نے کہا کہ فی الحال یہ اثرات محض ایک رات کی نیند سے محرومی کے شکار افراد میں نظر آئے تو یہ کہنا مشکل ہے کہ طویل المعیاد بنیادوں پر نیند کی کمی سے دماغی عمر پر کیا اثرات مرتب ہوتے ہیں۔

یہ بھی پڑھیں: رات کی نیند کو بہتر بنانے کے 3 زبردست طریقے