ہمارے جسم کی سب سے سخت جلد ایڑیوں کی ہوتی ہے اور جسم کے اس حصے میں نمی کی مقدار کم ہوتی ہے۔

اگر لاپرواہی برتی جائے تو دن بدن جلد کھنچنے لگتی ہے جس کے باعث ایڑیوں میں دراڑیں پڑ جاتی ہیں۔

اکثر اوقات خواتین گرمیوں میں بھی پھٹی ایڑیوں کی شکایت کرتی ہیں تو آج ہم آپ کو پھٹی ایڑیوں سے نجات کے نہایت ہی آسان طریقے بتائیں گے۔

سونے سے قبل ایڑیوں پر کریم لگا کر اس پر کاٹن کے موزے پہن لیں، کریم یا ایلو ویرا میں چینی ملا کر ایڑھیوں کا اسکرب کریں اس سے جلد ہائیڈریٹ رہے گی۔

اس کے علاوہ پانی میں گھر میں موجود خالص تیل ملا کر اپنے پاؤں بھگوئیں، نتیجہ آپ خود محسوس کریں گے جبکہ ویجیٹیبل آئل پھٹی ایڑیوں میں مددگار ثابت ہوتا ہے۔

ایڑیاں پھٹنے کی کیا وجوہات ہیں؟

ایڑیاں پھٹنے کی کئی وجوہات ہوسکتی ہیں جیسا کہ موٹاپا، وٹامنز کی کمی، گرم پانی سے نہانا، یا کھلے جوتے پہننا۔

گرم پانی سے نہانا ہمیں آرام تو دیتا ہے لیکن بد قسمتی سے یہ ہماری جلد کے لیے اچھا ثابت نہیں ہوتا، گرم پانی ہمارے جلد پر موجود قدرتی تیل کو نکال دیتا ہے، اس کے علاوہ ہمارے بالوں کے لیے بھی مفید نہیں ہوتا۔

موٹاپے کی وجہ سے ہمارے پاؤں پر پورے جسم کا وزن پڑتا ہے، زیادہ وزن ہونے کی وجہ سے تلووں پر ضرورت سے زیادہ دباؤ پڑتا ہے اسی لیے ایڑیاں پھٹ جاتی ہیں۔