آپ کو یہ جان کر حیرانگی ہو گی کہ ناخنوں سے انسانی صحت کے بارے میں معلومات حاصل کی جا سکتی ہیں۔

جی ہاں! ناخنوں کی رنگت سے جسم میں کسی ممکنہ بیماری کا اشارہ مل سکتا ہے، پھیپھڑوں، جگر اور دل کے مسائل کا علم بھی ہو سکتا ہے۔

اکثر ایسا بھی ہوتا ہے کہ ناخنوں میں بظاہر نظر آنے والی تبدیلی کسی بیماری کی وجہ سے نہ ہو لیکن ضروری ہے کہ اگر آپ کوئی تبدیلی محسوس کریں تو ڈاکٹر سے رجوع کریں۔

 یہاں ہم آپ کو بتائیں گے کہ ناخن آپ کی صحت کے بارے میں کیا راز چھپائے ہوئے ہیں۔

سفید داغ والے ناخن

صحت مند ناخنوں کی رنگت گلابی ہوتی ہے تو اگر ناخنوں پر سفید نشان نظر آنے لگے تو ایسا متعدد وجوہات کے باعث ہو سکتا ہے۔

جیسے کسی چوٹ لگنے، خون کی کمی، کسی غذائی جز کی کمی، دل یا گردوں کے امراض کے باعث ناخن پر سفید داغ ابھر آتے ہیں۔

مکمل سفید ناخن

اگر ناخنوں کا بیشتر حصہ بہت زیادہ سفید ہو تو اس سے جگر کے امراض جیسے ہیپاٹائٹس کا عندیہ ملتا ہے۔

زرد ناخن

اگر ناخن پیلے یا زرد نظر آنے لگے تو عموماً یہ کسی فنگل انفیکشن کا نتیجہ ہوتا ہے۔

کچھ کیسز میں زرد ناخن تھائی رائیڈ امراض، پھیپھڑوں کے امراض یا ذیابیطس کی علامت بھی ہوتے ہیں۔

ناخن ٹوٹنا

ایسے خشک اور بھربھرے ناخن جو اکثر ٹوٹ یا الگ ہو جاتے ہیں، وہ تھائی رائیڈ امراض کا اشارہ دیتے ہیں۔

ناخن کے نیچے گہرے رنگ کی لکیریں

اگر ناخن کے نیچے گہرے رنگ کی لکیر نموودار ہو جائے تو ایسا متعدد وجوہات کے باعث ہو سکتا ہے۔

جیسے جِلد کے کینسر، انفیکشن یا انجری کے باعث ناخن کی رنگت تبدیل ہو جاتی ہے اور اسے melanonychia کہا جاتا ہے۔

نیلگوں ناخن

اگر ناخنوں پر نیلا رنگ جھلکنے لگے تو اس کا مطلب ہے کہ جسم کو مناسب مقدار میں آکسیجن نہیں مل رہی۔

ناخں کی سطح پر لکیروں جیسا پیٹرن

اگر ناخنوں کی سطح پر اوپر سے نیچے کی جانب لکیروں جیسا پیٹرن  نظر آئے تو یہ جوڑوں میں ورم یا جِلد کے مرض چنبل کی نشانی ہوسکتی ہے۔