عمر بڑھنے سے جِلد کی موٹائی گھٹ جاتی ہے اور لچک بھی ختم ہونے لگتی ہے جس سے جھریاں نظر آنے لگتی ہیں۔

پیشانی پر بھی ایسی لکیریں بن جاتی ہیں جن کو پیشانی کی جھریاں کہا جاتا ہے۔

تو آج ہم آپکو پیشانی پر موجود جھریاں دور کرنے کہ چند طریقے بتائیں گے۔

سورج سے بچیں

سورج کی الٹرا وائلٹ شعاعوں میں بہت زیادہ وقت گزارنے سے قبل از وقت بڑھاپے کے آثار اور جھریاں نمودار ہو جاتے ہیں۔

ماہرین کا کہنا ہے کہ روزانہ ایس پی ایف 15 یا اس سے زیادہ نمبر والی سن اسکرین کے استعمال سے جِلد کی عمر کو بڑھنے اور جھریوں کی روک تھام ممکن ہے۔

تناؤ کو کنٹرول کریں

فکر مند اور تناؤ پیشانی میں جھریوں کی تعداد کو بڑھا دیتے ہیں۔

زندگی میں ہر طرح کے تناؤ سے نجات پانا بہت مشکل ہوتا ہے تو ضروری ہے کہ اسے کنٹرول میں رکھا جاسکے۔

اس مقصد کے لیے مراقبہ، یوگا کی مشق، گہری سانسیں لینا، خوشبو سونگھنا، مناسب نیند، ڈائری لکھنا اور ورزش کرنے جیسی عادات کو اپنایا جا سکتا ہے، جبکہ آپ ڈاکٹر سے بھی رجوع کر سکتے ہیں۔

پانی کا زیادہ استعمال

جسم میں پانی کی کمی سے جِلد خشک ہونے لگتی ہے اور مناسب مقدار میں پانی پینے سے پیشانی پر ابھرنے والی جھریوں کی روک تھام ممکن ہے۔

روزانہ 6 سے 8 گلاس پانی پینے کی کوشش کریں، اگر ورزش کرتے ہیں یا سورج میں وقت گزارتے ہیں تو پھر زیادہ پانی پینا چاہیے۔

متوازن غذا کا استعمال

ایک تحقیق کے مطابق غذا جِلد کی عمر میں اضافے میں اہم کردار ادا کرتی ہے۔

محققین کا کہنا ہے کہ وٹامن سی اور اومیگا 3 فیٹی ایسڈز کا زیادہ استعمال جِلد کو خشک ہونے سے بچاتا ہے۔

وٹامن سی سے جھریوں کی لکیروں کو گہرا ہونے سے روکنے میں بھی مدد ملتی ہے۔

اس کے مقابلے میں چکنائی اور کاربوہائیڈریٹس سے بھرپور غذا کے استعمال سے جھریوں کا خطرہ بڑھتا ہے۔

تمباکو نوشی نہ کریں

تمباکو نوشی سے دل، پھیپھڑے اور دیگر اعضا ہی متاثر نہیں ہوتے بلکہ قبل از وقت بڑھاپے اور جھریوں کا خطرہ بھی بڑھتا ہے۔

ایک تحقیق کے مطابق تمباکو میں موجود کیمیکلز سے جِلد کی لچک کو نقصان پہنچتا ہے جبکہ ایک ہارمون کولیگن کی مقدار گھٹ جاتی ہے، جس سے قبل از وقت بڑھاپے اور جھریوں کا سامنا ہوتا ہے۔