دنیا بھر میں ہارٹ اٹیک کی شرح میں دن بدن اضافہ ہوتا جارہا ہے لیکن اگر آپ اس سے بچنا چاہتے ہیں تو آج ہی ان عادات کو چھوڑ دیں۔

 ہارٹ اٹیک کا سامنا کسی فرد کو اس وقت ہوتا ہے جب دل کی جانب خون کا بہاؤ بہت زیادہ گھٹ جائے یا بلاک ہوجائے۔ عموماً شریانوں میں چکنائی، کولیسٹرول اور دیگر مواد کا اجتماع دل تک خون کے بہاؤ میں کمی کا باعث بنتا ہے۔

متعدد عناصر ہارٹ اٹیک کا خطرہ بڑھاتے ہیں جن میں سے خاندان میں اس بیماری کی تاریخ، جینز اور عمر کے ایسے عناصر ہیں، جن پر ہم کنٹرول نہیں کر سکتے۔

مگر اس سے ہٹ کر بھی ایسی عادات یا وجوہات موجود ہیں جو کسی فرد کو ہارٹ اٹیک کا شکار بنا سکتی ہیں۔

چھوٹی چھوٹی باتوں پر غصہ کرنا

اگر چھوٹی چھوٹی باتوں پر بہت زیادہ غصہ آنے لگتا ہے تو اس سے ہارٹ اٹیک کا خطرہ بڑھتا ہے۔

ایک تحقیق میں دریافت کیا گیا کہ اکثر ہارٹ اٹیک کے شکار ہونے والے افراد کو علامات نمودار ہونے سے 2 گھنٹے قبل بہت زیادہ غصہ آنے لگتا ہے۔

زیادہ وقت اسکرین کے سامنے گزارنا

جرنل آف دی امریکن کالج آف کارڈیالوجی میں شائع ایک تحقیق میں دریافت کیا گیا کہ جو افراد 4 یا اس سے زائد گھنٹے ٹیلی ویژن دیکھتے یا کمپیوٹر پر کام کرتے ہوئے گزارتے ہیں، ان میں دل کی شریانوں سے جڑے مسائل جیسے ہارٹ اٹیک کا خطرہ دیگر افراد کے مقابلے میں دوگنا بڑھ جاتا ہے۔

ہر رات 6 گھنٹے سے کم وقت تک سونا

ایک تحقیق میں دریافت کیا گیا کہ جو افراد ہر رات 6 گھنٹے سے کم سونے کے عادی ہوتے ہیں، ان میں ہارٹ اٹیک کا خطرہ 7 سے 8 گھنٹوں تک سونے والوں کے مقابلے میں 5 گنا زیادہ ہوتا ہے۔

بہت زیادہ گرم یا سرد درجہ حرارت میں رہنا

تحقیقی رپورٹس سے ثابت ہوا ہے کہ بہت زیادہ گرمی یا سردی دونوں سے لوگوں میں ہارٹ اٹیک کا خطرہ بڑھ جاتا ہے۔

فضائی آلودگی

ایک تحقیق میں دریافت کیا گیا کہ فضائی آلودگی بڑھنے سے ہارٹ اٹیک کا خطرہ بھی بڑھتا ہے۔ اس تحقیق میں بتایا گیا کہ فضا میں آلودگی کی سطح بڑھنے سے ہارٹ اٹیک کا خطرہ 48 فیصد تک بڑھ جاتا ہے۔

فلو ہونا

ایک تحقیق میں بتایا گیا کہ فلو کے شکار افراد میں ایک ہفتے بعد ہارٹ اٹیک کا خطرہ دیگر کے مقابلے میں 6 گنا زیادہ ہوتا ہے۔

تحقیق کے مطابق جب مدافعتی نظام فلو کا مقابلہ کررہا ہوتا ہے تو اس سے ہونے والا ورم دل اور شریانوں کو نقصان پہنچا سکتا ہے۔

زیادہ میٹھا کھانا

ایک تحقیق میں بتایا گیا کہ اگر آپ کی غذا میں چینی کی مقدار بہت زیادہ ہوتی ہے تو دل کی شریانوں سے جڑے امراض کے لیے بھی تیار رہنا چاہیے۔

تحقیق میں دریافت کیا گیا کہ غذا میں چینی کی مقدار جتنی زیادہ ہوگی، امراض قلب، فالج اور ہارٹ اٹیک کا خطرہ اتنا زیادہ ہوگا۔

طلاق

ایک تحقیق میں دریافت کیا گیا کہ طلاق کے بعد خواتین میں ہارٹ اٹیک کا امکان 25 فیصد تک بڑھ جاتا ہے۔ البتہ مردوں میں طلاق کے بعد ہارٹ اٹیک کا خطرہ اتنا نمایاں نہیں ہوتا، البتہ اگر 2 بار شادی ٹوٹ جائے تو پھر ہارٹ اٹیک کا خطرہ 30 فیصد تک بڑھ جاتا ہے۔

فاسٹ فوڈ کو پسند کرنا

فاسٹ فوڈ میں نمک، چینی، چکنائی، ٹرانس فیٹ، کیلوریز اور پراسیس اجزا کا استعمال بہت زیادہ ہوتا ہے جو جسمانی صحت کے لیے تباہ کن ہوتا ہے۔

فاسٹ فوڈ میں نمک کی مقدار کافی زیادہ ہوتی ہے جس سے ہائی بلڈ پریشر کا خطرہ بڑھتا ہے۔ ہائی بلڈ پریشر سے خون کی شریانوں کو نقصان پہنچتا ہے اور ہارٹ اٹیک کا خطرہ بڑھ جاتا ہے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں