زیادہ میٹھا کھانے والوں کے لئے بُری خبر آ گئی ہے۔

موجودہ عہد میں لوگ ضرورت سے زیادہ چینی کھانے کے عادی ہوچکے ہیں اور یہ میٹھے زہر کا کام کرتی ہے۔

 جان لیں کہ چینی کا زیادہ استعمال آپ کو کن امراض کا شکار بناسکتا ہے۔

جسمانی وزن میں اضافہ

موٹاپے کی شرح بڑھنے کی ایک وجہ میٹھے مشروبات کا استعمال ہے۔

سوڈا، جوس اور دیگر میٹھے مشروبات کے استعمال سے بھوک اور کھانے کی اشتہا بڑھتی ہے۔

اس کے ساتھ ساتھ ان مشروبات میں کیلوریز بھی بہت زیادہ ہوتی ہیں جس سے جسمانی وزن میں اضافہ ہوتا ہے۔

چینی کا زیادہ استعمال موٹاپے اور ذیابیطس ٹائپ 2 سے متاثر ہونے کا خطرہ بڑھاتا ہے۔

امراضِ قلب کا خطرہ بڑھتا ہے

جو افراد چینی کا زیادہ استعمال کرتے ہیں ان میں امراضِ قلب سے موت کا خطرہ 38 فیصد تک بڑھ جاتا ہے۔

میٹھی غذاؤں کے زیادہ استعمال سے جسمانی وزن اور ورم بڑھتا ہے جبکہ خون میں چکنائی کی مقدار بھی بڑھ جاتی ہے، یہ سب امراض قلب کا خطرہ بڑھانے والے عناصر ہیں۔

کیل مہاسے

ہر ہفتے 7 بار میٹھے مشروبات کو پینے والے افراد کو کیل مہاسوں کا سامنا زیادہ ہوتا ہے۔

چینی کا استعمال کم کرکے کیل مہاسوں کا خطرہ کم کیا جاسکتا ہے۔

کینسر کا سامنا

چینی کا زیادہ استعمال جسمانی ورم، تکسیدی تناؤ اور موٹاپے کا باعث بنتا ہے اور یہ تینوں عناصر کینسر کا خطرہ بڑھاتے ہیں۔

ایک تحقیق میں دریافت کیا گیا کہ میٹھے مشروبات کے استعمال سے کینسر کا خطرہ بڑھتا ہے۔

ڈپریشن

صحت کے لیے مفید غذا سے مزاج پر خوشگوار اثرات مرتب ہوتے ہیں، مگر چینی سے بھرپور غذاؤں کا استعمال ذہنی صحت پر منفی اثرات مرتب کرتا ہے۔

زیادہ میٹھے کے استعمال کو دماغی تنزلی، یادداشت کے مسائل اور ذہنی امراض انزائٹی اور ڈپریشن کا باعث قرار دیا جاتا ہے۔

جسمانی توانائی میں کمی

چینی سے بھرپور غذاؤں کے استعمال سے بلڈ شوگر اور انسولین کی سطح میں بہت تیزی سے اضافہ ہوتا ہے جس سے عارضی طور پر توانائی بڑھ جاتی ہے۔

مگر توانائی میں یہ اضافہ بہت تیزی سے کم بھی ہوتا ہے جس کے باعث تھکاوٹ اور کمزوری جیسے احساسات کا سامنا ہوتا ہے۔

بلڈ شوگر کی سطح میں مسلسل اضافہ اور کمی سے بھی جسمانی توانائی پر منفی اثرات مرتب ہوتے ہیں۔

دانت بھی متاثر ہوتے ہیں

چینی منہ میں پائے جانے والے بیکٹریا کی غذا بن جاتی ہے اور جب وہ اسے ہضم کرتے ہیں تو ایک تیزاب خارج کرتے ہیں جو دانتوں کی سطح کو متاثر کرتا ہے۔

یہی وجہ ہے کہ جو افراد اکثر میٹھی غذائیں کھاتے ہیں ان میں دانتوں کی فرسودگی کا خطرہ بہت زیادہ ہوتا ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں