گھرہو یا دفتر باتھ روم کی صفائی خاص اہمیت رکھتی ہے اس کی وجہ یہ ہے کہ  مختلف قسم جراثیم اور وائرس سب سے زیادہ اسی جگہ پر موجود ہوتے ہیں۔ کچھ لوگ ٹوائلٹ کے ڈھکن کو کھلا رکھ کر اور کچھ لوگ بند کر کے فلش کرتے ہیں لیکن درست طریقہ کیا؟ ماہرین نے اس حوالے سے یہ ایک نیا نظریہ پیش کیا ہے۔

گذشتہ دنوں امریکن جرنل آف انفیکشن کنٹرول میں شائع ہونے والی ایک تحقیق کے مطابق ٹوائلٹ میں کمبوڈ کو ڈھکن کے ساتھ فلش کرنے سے چھوٹے جراثیم کے پھیلاؤ کو نہیں روکا جاسکتا۔

باتھ روم میں جراثیم کو دیکھنے کے لیے ایک تحقیق کی گئی جس کے تحت محققین نے پورے بیت الخلا میں مائکرواسکوپک وائرل ذرات دریافت کیے۔ یہ ذرات دونوں صورتوں میں سامنے آئے یعنی جب ٹوائلٹ پرڈھکن کو بند کرکے  یا کھول کر فلش کیا گیا۔

اس تحقیق کے مرکزی محقق اور مائیکرو بایولوجسٹ چارلس گربا کا کہنا ہے کہ بہت سے لوگ یہ سجھتے ہیں ڈھکن بند ہونے سے مسئلہ ہوجاتا ہے۔

باتھ روم میں ڈبلیوسی ہویا کمبوڈ استعمال کے بعد فلش ضرور کیا جاتا ہے تاہم اس سے تیز پانی کے بہاؤ کے ساتھ ہوا بھی باہر آتی ہے جس سے یہ جراثیم ہر سو پھیل جاتے ہیں۔

ماضی میں کی جانے والی تحقیق سے یہ بات سامنے آئی تھی کہ ڈھکن بند کرنے سے جراثیم کے پھیلاؤ میں کمی آتی ہے، لیکن گربا نے نوٹ کیا کہ اس تحقیق میں بڑے وائرل ذرات پر توجہ مرکوز کی گئی تھی۔

جب کہ اس نئی تحقیق سے پتا چلا کہ ڈھکن بند کرنے سے غسل خانوں کی مجموعی آلودگی میں کوئی کمی نہیں آئی، تاہم ڈھکن بند کر کے فلش کرنے سے جراثیم کے پھیلنے کی رفتار ضرور کم ہوئی۔ جب ٹوائلٹ کا ڈھکن بند تھا تو تب اس کے سامنے اور بائیں جانب تھوڑی سی  زیادہ لیکن اس کے دائیں جانب تھوڑی کم آلودگی تھی۔

ٹوائلٹ کے ڈھکن کو بند رکھنے پر بحث کرنے کے بجائے تحقیق میں بتایا گیا کہ ٹوائلٹ کے پانی اور قریبی سطحوں کو جراثیم سے پاک کرنا جراثیم کے پھیلاؤ کو کم کرنے کا بہترین طریقہ ہے۔

ماہرین کے مطابق جب بیت الخلا میں ٹوائلٹ کو برش اور ہائیڈروکلورک ایسڈ جراثیم کش سے صاف کیا گیا تو باتھ روم صاف ستھرا تھا۔

گربا کا مزید یہ بھی کہنا ہے کہ آپ کو ٹوائلٹ کی سیٹ یا ڈبلیو سی کی صفائی کو ہمیشہ یقینی بنانا ہوگا تب ہی یہ جگہ جراثیم سے پاک رہ سکتی ہے۔جبکہ باتھ استعمال کرنے کے بعد ہاتھوں کو صابن اور پانی دھونا بھی ضروری ہے۔

ماہرین 20 سیکنڈ تک ہاتھ دھونے کا مشورہ دیتے ہیں، لیکن فلش کرنے کے بعد باتھ روم میں جراثیم زیادہ دیر تک رہ سکتے ہیں۔ جبکہ ایک اور تحقیق کے مطابق، جراثیم فلش کے بعد باتھ روم کی سطحوں پر تقریباً 30 منٹ تک زندہ رہ سکتے ہیں۔

ماہرین اپنی زیر استعمال چیزیں اور خود کو صاف رکھنے کے لیے مشورہ دیتے ہیں کہ آپ اپنے ٹوتھ برش اور کاسمیٹکس جیسی مصنوعات کو کھول کر نہ رکھیں اور اپنے فون کو باتھ روم میں استعمال کرنے سے گریز کریں ۔