سائنسدانوں نے حل ہی میں یہ انکشاف کیا ہے کہ اوائل عمر میں جو بچے سرسبز علاقوں اور درختوں کے پاس نشوونما پاتے ہیں اور اپنی بڑھوتری کے مراحل طے کرتے ہیں تو ان کی ہڈیوں کے اندر مادے کی کثافت زیادہ ہونے کی بنا پر ان کی ہڈیاں مضبوط ہوتی ہیں جبکہ سائنسدان اس کی ممکنہ وجہ معلوم کرنے بھی کوشش کر رہے ہیں۔

اگرچہ سرسبز علاقوں میں رہنے والے بچوں پر کیا جانے والا یہ مطالعہ کافی چھوٹا ہے اور جس میں شرکاء کی تعداد کم ہے لیکن ان کے اعدادوشمار یا شماریاتی اہمیت کو نظرانداز نہیں کیا جاسکتا۔ اس تجزیہ میں 327 بچوں کو شامل کیا گیا تھا جو بیلجیم کے ایک ایسے علاقے میں رہتے تھے جس میں ایک علاقے میں سبزہ زیادہ تھا جبکہ دوسرے علاقے میں سبزہ، درخت اور پودے نہ ہونے کے برابر تھے۔

4سے 6 سال کی عمر کے بچوں کے اندر باقاعدہ طبی اور سائنسی اصولوں کے تحت ہڈیوں کے اندر مختلف معدنیات اور ہڈیوں کی مضبوطی اور بھاری پن کے مروجہ ٹیسٹ کے ذریعے ان کی ہڈیوں کی صحت کا جائزہ لیا گیا تھا۔

اگر چہ اس میں ورزش اور والدین سے ملنے والی ہڈیوں کی مضبوطی، دودھ پینے، وٹامن ڈی اور کیلشیم جیسی مصنوعات لینے کو بھی مد نظر رکھا گیا تھا لیکن ماہرین ایک اہم پہلو یہ دیکھ کر حیران رہ گئے کہ سبزے یا سرسبزوشاداب علاقے کے پاس رہنے والے بچوں کی ہڈیوں میں غیر معمولی مضبوطی دیگر کے نسبت دیکھی گئی۔

سائنسدانوں نے کہا ہے کہ وہ بچے جن کے گھر کے ہزار میٹر کے اندر اگر سبزے کی مقدار پچیس فیصد بڑھی ہوئی ہو تو ان کے اندر ہڈیوں کی کمزوری، نرمی اور بھربھرے پن کا امکانات 66 فیصد تک کم ہوسکتے ہیں۔

بیلجیم کی ہیسیلٹ یونیورسٹی کے پروفیسر ٹم نوروٹ اور ان کے ساتھیوں نے یہ مطالعہ کیا ہے انہوں نے اسے خوش آئند قرار دیا ہے کہ اکثر سبز مقامات پر رہنے سے نہ صرف دماغی اور قلبی صحت بہتر ہوتی ہے نفسیاتی طور بچے بڑے مطمئین رہتے ہیں بلکہ اب اس ایک فائدہ یہ بھی سامنے آیا ہے کہ ان کی ہڈیوں میں غیر معمولی طور پر مضبوطی اور بھرا پن بھی دیکھا گیا ہے۔