سبز چائے کا شمار انتہائی صحت بخش مشروب میں ہوتا ہے، یہی وجہ ہے کہ حالیہ برسوں میں سبز چائے ہماری روزمرہ کی زندگی کا ایک لازمی حصہ بن گئی ہے۔

یہ اینٹی آکسیڈنٹس اور کیٹیچنز سے بھری ہوئی ہے، جو اسے خوبصورت جلد، عمل انہضام اور میٹابولزم کے لیے ایک بہترین مشروب بناتی ہے، جس سے مختلف جسمانی افعال کو مزید فروغ ملتا ہے۔ تاہم سبز چائے آپ کی صحت بہتر بنانے کے ساتھ آپ کو خوش بھی رکھ سکتی ہے۔

ماضی میں کی جانے والی تحقیق کے مطابق یہ صحت بخش مشروب اپنے اندر ایسے اجزاء لیے ہوئے جو نہ صرف امراض قلب اور فالج کے خطرے کو کم  کرنے میں مدد دیتے ہیں بلکہ یہ مزاج کو بہتر بنانے میں موڈ بوسٹر کے طور پر بھی کام کر سکتے ہیں۔

واضح رہے کہ سبز چائے میں ایسے بایو ایکٹیویٹس موجود ہوتے ہیں جو دماغ کو پر سکون رکھتے ہیں۔ سبز چائے کے اہم اجزاء میں کیفین، تھیانائن، ارجنائن اور ای جی سی جی (ایپیگلوکیٹچن گیلیٹ) شامل ہیں۔ ان بایو ایکٹیو اجزاء کا امتزاج دماغی صحت اور مزاج کو بہتر بنانے میں مدد فراہم کرتا ہے۔

2018 کی ایک تحقیق سے پتا چلا ہے کہ جو لوگ ہفتے میں کم از کم تین کپ سبز چائے پیتے ہیں ان میں ڈپریشن کا خطرہ ان لوگوں کے مقابلے میں 21 فیصد کم ہوتا ہے جو نہیں پیتے۔

اگرچہ سبز چائے یقینی طور پر آپ کے موڈ کو بڑھانے میں مدد کر سکتی ہے، تاہم، اس کے ساتھ غذائیت سے بھرپور غذا اور دیگر عوامل بھی اہمیت رکھتی ہیں۔