چائے ایک صحت بخش مشروب ہے جسے لوگوں کی اکثریت دن کے آغاز پر استعمال کرتی ہے تاہم حال ہی میں کی جانے والی ایک تحقیق میں اس خوش ذائقہ مشروب کی اور بھی افادیت سامنے آئی ہے جس کے مطابق چائے کا استعمال آپ کی صحت کے ساتھ زندگی کو بڑھاسکتا ہے۔

چین کے چینگڈو کی سچوان یونیورسٹی کی ایک تحقیق کے مطابق دن میں تین کپ چائے پینا آپ کی زندگی کو بڑھا سکتا ہے۔ چائے کے صحت اور عمر رسیدگی پر اثرات جاننے کے لیے ایک تحقیق کی گئی جس میں محققین نے برطانیہ سے تعلق رکھنے والے 37 سے 73 سال کی عمر کے 5998 افراد کے علاوہ چین میں 30 سے ​​79 سال کی عمر کے 7931 افراد کے چائے پینے کی عادتوں کے حوالے سے سروے کیا۔ واضح رہے اس سروے میں زیادہ تر مردحضرات شامل تھے۔

تمام شرکاء سے سوال کیا گیا ہے وہ دن بھر میں کتنے کپ اور کس طرح کی چائے جیسے کالی، سبز، پیلی یا روایتی چینی اولونگ چائے پیتے ہیں۔ اسی طرح تمام شرکاء کی حیاتیاتی عمر کو ان کے جسم میں چربی ، کولیسٹرول اور بلڈ پریشر کو دیکھتے ہوئے نوٹ کیا گیا۔

تاہم، یہ مطالعہ محض مشاہدہ تھا، لہذا محققین یہ ثابت نہیں کر سکے کہ آیا چائے پینے سے حیاتیاتی عمر میں کمی آتی ہے۔ بہر حال، مسلسل چائے پینے والوں میں عمر بڑھنے کی علامات آہستہ اور دیر سے ظاہر ہوئیں۔

محققین کا نتائج کو مد نظر رکھتے ہو ئے کہنا تھا کہ روزانہ تقریباً تین کپ چائے یا چھ سے آٹھ گرام چائے کی پتی کا استعمال بڑھاپے کے خلاف سب سے زیادہ واضح فوائد پیش کر سکتا ہے۔

انہوں نے مزید یہ بھی نتیجہ اخذ کیا کہ اعتدال پسند چائے کا استعمال مسلسل چائے پینے والوں کی نسبت بڑھاپے کی رفتار کو سست کرنے جیسے مضبوط ترین فوائد پیش کرتا ہے۔ تحقیق میں شامل ایسے شرکاء جنہوں نے چائے پینا چھوڑ دیا تھا ان میں عمر بڑھنے کی علامات ظاہر ہونا شروع ہونے لگی۔

محققین کا خیال ہے کہ اس کی وجہ چائے میں موجود  ایک بایو ایکٹیو مادہ پولیفینول ہے جو گٹ بیکٹیریا کو ماڈیول کرتا ہے، مدافعتی نظام، میٹابولزم اور علمی افعال کو منظم کرنے میں کردار ادا کر سکتا ہے۔ انہوں نے یہ بھی نوٹ کیا کہ فلیوونائڈز ایک قسم کا پولی فینول جو چائے میں بکثرت پایا جاتا ہے عمر رسیدگی کے اثرات کو دور کرنے کے لیے جانا جاتا ہے۔

محققین کے مطابق چائے کا استعمال عمر سے متعلق بیماریوں جیسے کہ امراض قلب ، ذیابیطس، ڈیمنشیا اور کینسر کی کچھ اقسام سے بچا سکتا ہے، اور موت کے کم خطرے سے منسلک ہے۔ یہی وجہ ہے کہ  چائے کا استعمال انسانوں میں حیاتیاتی عمر بڑھنے کے عمل کو سست کر سکتا ہے۔

سائنسدانوں کا کہنا ہے کہ اس تحقیق کے دوران چائے کی کسی خاص قسم سے عمر رسیدگی کے اثرات پر کوئی فرق نہیں پڑا ہر طرح کی چائے نے اسی طرح کے فوائد پیش کیے جبکہ چائے کو گرم یا ٹھنڈا پینا بھی اثرانداز نہیں ہوا تاہم اس تحقیق کے دوران شرکاء سے چائے کے کپ کا سائز نہیں پوچھا گیا ۔