پوری دنیا میں ڈپریشن حیرت انگیز حد تک ایک عام بیماری بن چکا ہے۔

ڈپریشن ایک موڈ سے متعلقہ بیماری ہے اور یہ روز مرہ کے کام مثلا کھانا، پینا، سونا، جاگنا اور معاشرتی رویوں کو شدید طور پر متاثر کرتا ہے۔

ڈیپریشن کئی اقسام کا ہو سکتا ہے، کسی بھی قسم کے ڈیپریشن میں پیدا ہونے والی ناامیدی کی شدید لہر انسان کو تباہ کن حد تک متاثر کرتی ہے۔

زیادہ تر لوگ اپنے دل کی باتیں دل میں رکھتے ہیں اور دل ہی دل میں کڑھتے رہتے ہیں جس کی وجہ سے ان کی سوچیں مزید الجھ کر ان کو ڈپریشن اور انزائٹی جیسے امراض کا مریض بنا دیتی ہیں۔

لیکن ایک حالیہ تحقیق کے مطابق مخصوص ورزشوں کو عادت بنانے سے آپ خود کو ڈپریشن اور انزائٹی سے محفوظ رکھ سکتے ہیں۔

جی ہاں، تحقیق میں بتایا گیا کہ بھاری وزن سے کی جانے والی ورزشوں سے انزائٹی اور ڈپریشن سے بچنے میں مدد ملتی ہے۔

درحقیقت جو افراد انزائٹی یا ڈپریشن کی علامات کا سامنا کر رہے ہوتے ہیں، ان کے لیے یہ ورزشیں علاج جیسا اثر کرتی ہیں۔

تحقیق کے دوران ڈمبلز، ویٹ لفٹنگ یا ایسی ہی دیگر ورزشوں سے انزائٹی یا ڈپریشن پر مرتب اثرات کی جانچ پڑتال کی گئی تھی۔

تحقیق میں دریافت کیا گیا کہ بھاری وزن سے کی جانے والی ورزشوں کو انزائٹی اور ڈپریشن کی علامات سے نجات کے طور پر استعمال کیا جا سکتا ہے۔

محققین نے بتایا کہ انزائٹی اور ڈپریشن جیسے امراض کی روک تھام آسانی ممکن ہے مگر پھر بھی یہ دونوں دنیا بھر میں تیزی سے پھیل رہے ہیں۔

ان کا کہنا تھا کہ مسلز کو مضبوط بنانے والی ورزشوں سے جسم کے ساتھ ساتھ دماغی صحت کو بھی فائدہ ہوتا ہے۔