روغن زیتون دنیا کے تمام تیلوں میں سب سے زیادہ صحت بخش تیل تصور کیا جاتا ہے یہی وجہ ہے کہ اسے سونے کی طرح  قیمتی اور تیل کا بادشاہ قرار دیا گیا ہے۔ اس میں مونو سیچوریٹڈ اور اینٹی آکسیڈینٹ اور دیگر صحت مند مرکبات پائے جاتے ہیں جو جانوروں یا پروسیس شدہ چکنائیوں میں موجود نہیں ہوتے۔

روغن زیتون کو مختلف غذا میں شامل رکھنے سے آپ صحت مند رہتے ہی ہیں تاہم ماہرین کے مطابق روزانہ ایک چمچ زیتون کا تیل کسی بھی طرح لینا صحت سے متعلق حیرت انگیز فوائد فراہم کرتا ہے یہاں تک کہ آپ کی جان بھی بچا سکتا ہے۔

روغن زیتون کس طرح آپ کی صحت کو بہتر بناتا ہے؟

یہ سنہرا تیل اپنے اندر قدرتی قبض کشا اثرات رکھتا ہے جس کے استعمال سے قبض سے نجات ملتی ہے یہ بات تو آپ سب ہی جانتے ہیں کہ قبض کو ام الامراض کہا جاتا ہے جبکہ چکنائی آنتوں کو سکون فراہم کرتی ہے اور اس میں موجود مواد کو زیادہ پانی جذب کرنے میں مدد دیتی ہے۔

 تو  ایسے تمام افراد جو قبض جیسے مرض میں مبتلا ہیں روزانہ روغن زیتون کا ایک چمچ استعمال کرنے سے قبض سے نجات حاصل کر سکتےہیں۔

  ماضی میں کی جانے والی بہت سی تحقیق کے مطابق روغن زیتون کو غذا میں شامل رکھنا ڈیمنشیا سے مرنے کا خطرہ کم کر سکتا ہے واضح رہے کہ  عالمی ادارہ صحت کے مطابق ڈیمنشیا موت کی ساتویں بڑی وجہ ہے۔

ہارورڈ  یونیورسٹی کی ڈاکٹر این جولی ٹیسیئر کے مطابق روغن زیتون میں موجود کچھ اینٹی آکسیڈنٹ مرکبات خون کے ذریعے براہ راست دماغ  تک پہنچ کر اثر ڈال سکتے ہیں جبکہ یہ بھی ممکن ہے کہ یہ روغن قلبی صحت کو بہتر بناکر دماغی صحت پر مثبت اثرات مرتب کریں معاملہ کوئی بھی ہو دونوں ہی صورتوں میں یہ دماغ کے لیے مفید ثابت ہوتا ہے۔

ایک اور تحقیق کے مطابق روزانہ روغن زیتون کا صرف آدھا چمچ  کینسر، نیوروڈی جنریٹیو اور تنفس کے امراض سے مرنے کے خطرے کو کم کر سکتا ہے۔

روغن زیتون کو کب استعمال کیا جائے؟

روغں زیتون کے ایک یا دو چمچ صبح سویرے خالی پیٹ لینا خاصا فائدہ مند ثابت ہوتا ہے۔اس طر ح اس روغن کو ہضم ہونے میں بھی مدد ملتی ہے اور ساتھ ہی یہ فضلہ کو باہر نکالنے اور دن بھر آنتوں کے مائیکرو بائیوم  کو منظم کرنے میں بھی معاون ثابت ہوتا ہے۔

کونسا روغن زیتون استعمال کیا جائے؟

کولڈ پریس کے ذریعے کشید کیا جانے والا تیل سب سے خالص اور صحت بخش قرار دیا جاتا ہے۔ اس لیے کوشش کریں کہ ایکسٹرا ورجن آلیو آئل استعمال کیا جائے۔

جبکہ زیتون سےزیادہ مقدار میں تیل کشید کرنے کے لیے اسے گرم کر کے بھی تیل کشید کیا جاتا ہے ایسی صورت اس میں موجود صحت بخش اجزا ضائع ہوجاتے ہیں۔