پلاسٹک کو اس صدی کی سب سے بدترین ایجاد کہا جائے تو غلط نہیں ہوگا۔ یہی وجہ ہے کہ دنیا سے پلاسٹک کے کچرے کو صاف کرنا چند بڑے چیلنجوں میں سے ایک ہے اس کی وجہ یہ ہے کہ اب یہ پلاسٹک کے باریک ذرات غذاؤں یہاں تک کے پانی میں شامل ہوکر براہ راست انسانی صحت کو متاثر کر رہے ہیں۔

تاہم اب پانی سے مضر صحت پلاسٹک کے ذرات کو صاف کرنے کا ایک نہایت آسان سا طریقہ دریافت کر لیا گیا ہے جس کے ذریعے پینے کے پانی کو خطرناک مائیکرو پلاسٹک سے پاک کیا جاسکتا ہے۔

ایک نئی چینی تحقیق میں دعویٰ کیا گیا ہے کہ گھر میں پانی کو ابال کر استعمال کرنا اس میں سے خوفناک مائیکرو پلاسٹک کے ذرات کو دور کرنے کا ایک تیز اور موثر طریقہ ہے۔

یہ مائیکرو ذرات گزشتہ چند برسو ں سے دنیا بھر کے لیے تشویش کا باعث بن رہے ہیں جو آپ کی خوراک اور پانی میں بہت بڑی مقدار میں پائے جاتے ہیں، یہ غذا اور پانی انسانی جسم میں داخل ہوکر خون کے دھارے میں شامل ہوجاتے ہیں۔ جہاں یہ مائیکرو پلاسٹک میٹابولک عوارض جیسے ذیابیطس کا باعث بن سکتے ہیں۔

جبکہ انتہائی باریک ذرات مدافعتی ردعمل میں خلل کا سبب بن سکتے ہیں، اعصابی نظام کو نقصان پہنچا سکتے ہیں اور تولیدی نظام میں مداخلت کر سکتے ہیں۔

تاہم جنین یونیورسٹی کے سائنسدانوں نے کہا ہے کہ نلکے کا پانی فلٹر کرنے اور ابالنے سے پلاسٹک کے مائیکرو ( ایک میٹر کےدس لاکھویں حصے) اور نینو ( ایک میٹر کے ایک اربویں حصے) جتنے باریک ذرات کی 90 فیصد مقدار ختم ہوجاتی ہے۔

یہ اس لیے ہوتا ہے کہ پانی کی کیتلی میں دودھیا تلچھٹ پلاسٹک سے تعامل کرتی ہے، انہیں جذب کرکے پانی سے نکال باہر کرتی ہے۔ پانی کے بھاری اور ہلکے ہونے کی بنا پر پلاسٹک معدن کے باریک ڈلوں کی صورت بھی جمع ہوجاتے ہیں اور سطح آپ پر تیرنے لگتے ہیں۔

اس طرح پانی صاف ہوجاتا ہے جبکہ دوسری صورت میں پانی کو فلٹر بھی کیا جا سکتا ہے۔ گھریلو استعمال ہونے والے کافی کے فلٹر کے ذریعے آپ پانی کو فلٹر کر سکتے ہیں۔

اس تحقیق کے لیے محققین نے نل کے پانی میں موجود نینو اور مائیکرو پلاسٹک کی مختلف مقداروں کا تجزیہ کیا پھر پانی کو چند منٹ تک ابالنے کے بعد دوبارہ اس کی جانچ کی۔

ہارڈ واٹر میں، پلاسٹک کے 90 فیصد ذرات جو قطر میں ایک ملی میٹر کے ایک ہزارویں حصے کے برابر تھے ختم ہوگئے تھے جبکہ عام پانی میں تقریباً 25 فیصد تک کم ہوگئے تھے۔

یہاں تک کہ کچھ گھریلو فلٹریشن سسٹم بھی پلاسٹک کے کچھ ذرات کو صاف کر سکتے ہیں مگر بڑی تعداد میں نہیں اس لیے پانی کو صاف کرنے کے لیے ابالنا زایادہ کار آمد ثابت ہوسکتا ہے۔

دنیا میں بہت سے ممالک ایسے ہیں جہاں پینے کے پانی کو ابال کر استعمال کرنے کا رواج ہے اس طرح وہ بہت آسانی سے پینے کے پانی کو پلاسٹک کی آلودگی سے پاک کر سکتے ہیں۔ یہ عام عمل آپ کی صحت کے لیے بے حد مفید ثابت ہوسکتا ہے ۔