آج ہم آپکو روزانہ چہل قدمی کرنے کا حیران کُن فائدہ بتائیں گے۔

ایک حالیہ تحقیق کے مطابق ورزش نہ کرنے والے افراد اگر چہل قدمی کو معمول بنا لیں تو ان کی اوسط عمر میں لگ بھگ ڈھائی سال کا اضافہ ہو جاتا ہے۔

جی ہاں، تحقیق میں بتایا گیا کہ ہر ہفتے 15 ہزار قدم چلنے سے متعدد امراض سے متاثر ہونے کا خطرہ کم ہو جاتا ہے۔

اس تحقیق میں ایک لاکھ افراد کی صحت کا جائزہ 10 سال تک لیا گیا تھا اور نتائج سے معلوم ہوا کہ اچھی صحت کے لیے روزانہ 10 ہزار قدم چلنے کی ضرورت نہیں، درحقیقت اس سے کم چلنے سے بھی صحت کو فائدہ ہوتا ہے۔

تحقیق کے مطابق اس عادت سے سب سے زیادہ فائدہ معمر افراد کی صحت کو ہوتا ہے۔

مثال کے طور پر 65 سال یا اس سے زائد عمر کے افراد چہل قدمی کو عادت بنا کر کسی بھی وجہ سے موت کا خطرہ 52 فیصد تک کم کر سکتے ہیں۔

اس کے مقابلے میں 45 سے 65 سال کے افراد اس جسمانی سرگرمی سے موت کا خطرہ 38 فیصد تک کم کر سکتے ہیں۔

محققین کا کہنا ہے کہ جسمانی سرگرمیوں سے موٹاپے اور ذیابیطس ٹائپ 2 سے متاثر ہونے کا خطرہ کم ہوتا ہے اور یہ دونوں عناصر امراض قلب اور دیگر امراض کا شکار بنانے میں کردار ادا کرتے ہیں۔

انہوں نے کہا کہ ذیابیطس ٹائپ 2 کے مریض ہر ہفتے 3 بار 5 ہزار قدم چل کر موت کا خطرہ 40 فیصد تک کم کر سکتے ہیں۔

محققین کے مطابق محض ایک دن 5 ہزار قدم چلنے سے بھی صحت بہتر ہوتی ہے۔